Fikai Muntu ye Mubena Kufunjisha pa Muchima
1 Yesu saka akyangye kuya mwiulu, wakambizhe baana banji ba bwanga kufunjisha bantu ‘kulama’ byonse byo ebakambizhe. (Mat. 28:19, 20) Umvwe byambo byamufika muntu pa muchima, byo bilengela ‘kulama’ mikambizho ya kwa Kilishitu. (Sala. 119:112) Mwakonsha kumufika byepi pa muchima muntu ye mubena kufunjisha Baibolo?
2 Lombai Yehoba Kwimutangijila: Kulenga baana ba bwanga ke mwingilo wa Lesa. Bulume bwanji bo bwitukwasha kwingila bulongo, kechi bulume bwetu ne. (Byu. 16:14; 1 Ko. 3:7) Onkao mambo, kyanema bingi kulomba kwi Yehoba kuba’mba etukwashe kufunjisha bantu bukine.—Isa. 50:4.
3 Yukai Bintu Byaitabila Muntu ye Mubena Kufunjisha Baibolo: Umvwe mwayuka bintu byaitabila bantu ne ene mambo ebalengela kwibitabila, kikwashako kuyuka mwakwambila pa kuba’mba mwibafike pa muchima. Mambo ka awo ubena kufunda Baibolo kyoatemenwa luno lufunjisho lo aitabila? Kika kyamushiina kuba’mba lwa kine? Kuyuka bino byonse kwakonsha kwimukwasha kuyuka mwakwambila.—Byu. 17:22, 23.
4 Ambai Bishinka bya mu Binembelo: Twafwainwa kufunjisha muntu bukine saka abena kwibumvwisha. (Byu. 17:24-31) Luketekelo lo tuji nalo lwafwainwa kulumbululwa bulongo. (1 Pe. 3:15) Bino, kimye kyonse mwafwainwa kuba kino na butemwe ne na butekanye.
5 Lumbululai na bya Kumwenako: Bya kumwenako kechi bilengelatu ubena kufunda kumvwa bukiji ne, bino bimukwasha kumvwisha. Bifika mu milangwe ne pa muchima. Yesu wibingijishenga javula. (Mako 4:33, 34) Pa kuba’mba kya kumwenako kingile bulongo, kyafwainwa kwesakana na kishinka kyo mubena kwambapo kabiji kyafwainwa kulamata ku bwikalo bwa ye mubena kufunjisha.
6 Lumbululai Buwame bwa Kutambwila Bukine: Bantu bakeba kuyuka buwame buji mu kwingijisha byo babena kufunda. Kwashai ye mubena kufunjisha kumona maana aji mu byambo bya kwa Paulo pa 2 Timoti 3:14-17.
7 Kange mulefulwe umvwe bamo bakana kumvwina byo mubena kufunjisha ne. Kechi bantu bonse bomvwa ne. (Mat. 13:15) Nangwa byonkabyo, bamo bomvwa bukine ne kwibwitabila. (Byu. 17:32-34) Onkao mambo, lekai bulume bwenu bwa kwibafika pa muchima na mambo awama bwibakwashe kumvwa ne ‘kulama’ mikambizho ya kwa Yesu.