Nanchi Mubena kwingijisha Byomwafunjile Pakupwila Kwankambi kwa “Bafunjishi ba Mambo a Lesa” Nyi?
1 Muntu yense watainwe kukupwila kwankambi kwa uno mwaka wamwene’mba kine bantu ba Yehoba babena kukeba kwingila mwingilo wabo wabufunjishi bwa Mambo a Lesa. (Mat. 28:19, 20) Byomwabwelele kunzubo, ñanyi bishinka byomwafunjile byomubena kukeba kwingijisha mubwikalo bwenu nemu mwingilo wenu wamubujimi?
2 Binembelo Byanembeshiwa Byawamina Mukwibafunjisha Bantu: Mutwe wajuba jitanshi waambile bingi pa kinembelo kya 2 Timoti 3:16. Jashi jikatampe jalumbulwile’mba pakuba’mba twikale “Bafunjishi ba Mambo a Lesa Bawaina Byonse,” twafwainwa kunemekesha Mambo a Lesa kukila maana abantu nangwa mizhilo ya buntunshi, nekwiengijisha nabukishinka. Twafwainwa kulombanga mupashi wazhila kimye kyonse amba etukwashenga mumwingilo wetu nekukomesha butemwe, kipangwa kyanji kikatampe. Kabiji twafwainwa kukosela mu Jibumba ja Yehoba ja panopantanda kuba’mba jitufunjishenga kwikala bamingilo kupichila mukupwila kubiwa pakipwilo.
3 Jashi jakushilañana jakuba’mba, “Kwifunjisha Atweba Bene ne Kufunjisha Bakwetu,” jalumbulwile’mba twafwainwa kwikala bakumwenako mu (1) kusunga mizhilo ya Lesa ya byubilo byonse byawama bya bwina Kilishitu, (2) kwikala nalufunjisho lwawama lwapabunke, ne (3) kuleka byubilo nemilanguluko yamu muchima ilengela Satana kwitushukilwa. Kikwabo, twafunjile mizhilo yawama yakuvimbilamo kisemi kyetu kubyubilo bincha byaino ntanda bya mulekese. Bansemi bakambizhiwe kwikala bakumwenako mukuchinuzhuka kutambakotu nangwa pacheche bimwesho byamulekese nekusopa bibena kutamba baana babo pa intaneti ne pa televizhonyi. Ñanyi bishinka byaambiwepo pajuba jitanshi byomwatatula kwingijisha?
4 Jashi jakupezhako jakoseshe mulanguluko wetu wakutemwa kyeya kya Yehoba, kufwenya kwipi nabena Isalela ba Lesa nekutundaika mutende wabantu ba Yehoba. Abya mwatanga kala buku walupulwa katataka, wa Ukusesema kwa kwa Esaya—Ulubuuto lwa Bantu Bonse 2 nyi?
5 Bakonsha Kufunjisha Bakwabo: Mutwe wajuba jabubiji wafumine mu 2 Timoti 2:2. Byomwatelekelenga kujashi jakushilañana lukelo, abya mwaumvwinepo mashinda mwa (1) kukebela-kebela bantu bafwainwa, (2) kukomesha lusekelo lwabo lwakukeba kufunda bukine, ne (3) kwibafunjisha kulama byonse byakambizhe Yesu nyi? Nanchi mubena kulondela byomwafunjile—kumweshapo mwinanzubo kishinka kimo mu Binembelo nekwikala napakukatendekela mwisambo pakukabwelako jibiji nyi?
6 Majashi a mabanga akonkomwejilenga pabuneme bwakulondalonda Yesu Mufunjishi Mukatampe. Muñanyi mashinda momubena kwesekela kumulondalonda? Kwesakana nabyomwafunjile mujashi jakushilañana jabubiji pajonka jino juba jabubiji, mwakonsha ‘Kufunda byepi Byavula mu Lufunjisho lwa Lesa’? Ñanyi mashinda omubena kwingijisha akwikelamo nakimye kyabaya kyakuteleka kimye kyalufunjisho lwapabunke nepa kupwila kwakipwilo?
7 Kwakubula nangwa kuzhinaukatu ne, bukwasho bubena kwiya bwa Nonkelenimo mu Masambililo ye Sukulu lya Butumikishi Ilya Bulesa buketukwasha kukomenako muñambilo nemubufunjishi bwa Mambo a Lesa. Kukekalanga kwamba ñambilo yaambiwangapo nabakalume bakishinka bakala bajingako mukimye kyanembelwenga Baibolo. Mu mafunjisho onse auno buku wakatataka wakufundamo muji tubokoshi tubena kumwesha byotwafwainwa kuba, ene mambo okyanemena kubabyobyo nemwakwibyubila. Muji nemingilo yakuba. Muji mashinda akwambilamo 29 banyenga obakasalululanga mwakwambila kimye kyobakambanga majashi abo. Mukuya kwamoba, luno lupimpu lwabijikwa lukanembwa mumutanchi wasukulu. Nanchi muji namuteeto wawama wakufunda nekunengezhezha jimo pakuba’mba mukafunde byavula mu Sukulu ya Mwingilo wa Teokalasi mulungu nemulungu nyi?
8 Ikalai Bafunjishi Kyonka Kino Kimye: Kinembelo kya Bahebelu 5:12 kyaambiwepo bingi pajuba jabusatu. Jashi jakushilañana lukelo jakuba’mba, “Bungauzhi bwakwa Malakai Bubena Kwitufunjisha Mambo a Juba ja Yehoba,” jitukambizhe kupa Lesa byawamisha nekushikwa bukamfutumfutu bonse pakuba’mba tukapuluke juba ja Yehoba jikatampe jilenga moyo. Kifwanyikizho kyakuba’mba, “Nemekai Buntangi bwa Yehoba,” kyamwesheshe kwitota, kukeba buntangi, kichima nekubula bukishinka kwakwa Kola nebakwabo byokwibalengejile kusatukila Yehoba. Jashi jalondejilepo jaambile pabuneme bwaba mukisemi nemukipwilo bonse kukokela buntangi bwa Lesa na bukishinka. Jashi jamvula-bantu, jakuba’mba “Bañanyi Babena Kufunjisha Bukine ba mu Mikoka Yonse ya Bantu?,” jalumbulwile kuba’mba Bakamonyi bakwa Yehoba bo bonka babena kufunjisha bukine bwamu Baibolo kupusanako nabamu Kilishitendomu betelatu bino kechi byoboba ne.
9 Kyakine, Yehoba ubena kwitufunjisha kwikala bafunjishi bawama ba Mambo anji. Twayai twingijishenga byotwafunjile, ne ‘kwiketa atwe bene nelufunjisho lwetu pamo, pakuba’mba tukepulushe atwe bene ne abo betumvwa pamo.’—1 Timo. 4:16.