Byotwafunjile Pakupwila Kwankambi kwa “Bamukoyo Wakutaya Mbila ya Bufumu”
1 Majashi Alutundaiko: Byoetutundaikilepo majashi otwafunjile pakupwila kwetu kwankambi kwajingako katataka papo! Twakonkene nankebelo imo yakuba’mba tufunde byakwikala bamukoyo wakutaya mbila ya Bufumu bwa Lesa. Abya mukivuluka ñambi mutanshi byoalumbulwile byambo byakuba’mba “kutaya mbila”? Nanchi mukivuluka bintu byotwafwainwa kupesa-pesa mujashi jaambilenga’mba: “Kechi Twikale na Moyo ne, Mambo Twayuka Namba Yehoba Uji Neatweba” byojitutundaikilenga kuba? Ñanyi mashimikila amubwikalo akine omwapesa-pesapo kala?
2 Jashi jakushilañana jaambilenga’mba: “Lwitabilo Lwetu Lwesekwa Nameseko Apusana-pusana” jaambilepo bishinka bikatampe bisatu byalumbulwilenga Yehoba kyoaswishisha lumanamo. Mwakonsha kulondolola bino bishinkanyi? Ñanyi bishinka byamu Binembelo byabwina Kilishitu bwetu bitulengela kubula kwivwanga mubyaino ntanda? Twatundaikilwe kubaka pakuba’mba twinengezhe atwe bene kumeseko eya namambo akubula kwivwanga mubyaino ntanda? Kuchinchika kotuchinchika meseko mubukishinka kumuletela byepi Yehoba lutotelo?
3 Ñanyi bipungu mukifwanyikizho kyaambilenga’mba: “Kosai Mubimye Byamalwa” kikatakata bimukoseshe? Twakonsha kulonda byepi Yelemiya?
4 Jashi jamvula-bantu jaambilenga’mba: “Musango wa Panopantanda Ubenakupichijila,” jalumbulwile ñanyi bintu bikamweka kwipi nakunangijila ku juba ja Lesa jilengesha moyo? Byomwatelekelenga kujashi jakupelako jaambilenga’mba: “Ingilai Mingilo Yawama Byomuji Bamukoyo Wakutaya Mbila ya Bufumu,” mwaingijisha byepi bishinka mumwingilo wenu wamubujimi?
5 Bishinka Bikatampe Byakwingijisha: Byonka byokyalumbulwilwe mujashi jaambilenga’mba: “Ikalai Namuchima Wakusanta,” twakonsha kumwesha byepi lusanchilo lwetu kufuma panshi yamuchima kwi Yehoba? Mujashi jikatampe jaambilenga’mba: “Bataya Mbila ya Bufumu Batundaikwa Namukoyo,” mukoyo wabañanyi yetwatundaikilwe kulonda? Ñanyi kwipesa-pesa kobetwipwizhe kotwafwainwa kuba?
6 Jashi jakushilañana jaambilenga’mba: “Bungauzhi Bwakwa Mika Bwitukosesha Kwenda Mujizhina Ja Yehoba,” jaambilepo bikebewaka bisatu byotwafwainwa kwikala nabyo pakuba’mba twikale bantu baitabilwa kwi Yehoba? Nanchi bino twakonsha kwikala nabyonyi? (Mika 6:8) Kwesakana najashi jaambilenga’mba: “Lamai Muchima Wenu Kuba’mba Mwikale Nabyubilo Byawama,” muñanyi mashinda motwafwainwa kwikela nabyubilo byawama? Muñanyi mashinda jashi jaambilenga’mba: “Chinai Byabujimbijimbi Nekujimbaikwa” mojitujimwijile kubula kujimbaikwa nekubula kujimbaika bakwetu?
7 Ñanyi bishinka byanema byaambiwe mujashi jakushilañana jaambilenga’mba: “Bataya Mbila ya Bufumu Batumbijika Mwingilo Wabo” byomwatendeka kwingijisha mumwingilo wenu wamubujimi? Filipai 4:8 walondolwelwepo mujashi jaambilenga’mba: “Kwisamba Nabakwetu Byakumupashi Kukomeshañana.” Kino kinembelo kitukwasha byepi kuba’mba twisambenga misambo yakumupashi, kabiji ñanyi kimye kyotwafwainwa kubanga byobyo?
8 Jashi jaambilenga’mba: “Ketekelai mwi Yehoba Namuchima Wenu Yense Mubimye Byamalwa” jaambilepo pabyotwafwainwa kuba nabyamalwa bitumwekela, makatazho amali, kukolwa-kolwa, makatazho mukisemi, nebintutu bikwabo bituponena. Twakonsha kuketekela byepi mwi Yehoba umvwe ketupite mubino bintu?
9 Bintu Byabuneme Byakumupashi Byakatataka: Twatemenwe bingi kutambwila buku wakatataka wa Pepeni Lesa Wine Wine Eka. Kubijikwa kwabijikilwe kwakulumbulula byakumwingijisha uno buku kwimulamachile byepi? Uno buku ukakwasha byepi mumwingilo wetu wakulenga baana babwanga byoaji buku wabubiji wakufundamo lufunjisho?
10 Kabiji twatambwijile nebuku mukwabo wawama wa Palameni Kuli Yehova. Ñanyi mitwe imo yawama ijimo? Bipikichalaka bimo kikatakata byomwatemwa? Nanchi byomubena kumutanga kimulengela kufwenya kwipi ne Yehoba nyi? Bañanyi bakwabo bakonsha kumwenamo mfweto muuno buku?
11 Kupwila Kwankambi kwa “Bamukoyo Wakutaya Mbila ya Bufumu” kwitupele bingi lutundaiko lwakumupashi lwitufwainwa kushinjilamo makatazho mubino bimye byakatazha. Pakuba’mba tumwenemo mfweto muluno lunengezho lwakumupashi lwawama byonkabye, twayai twingile nangovu tuvulukenga byaambiwepo, tusanchile bintu byotwatambwile, nekwingijisha bintu byotwafunjile. (2 Pe. 3:14) Kuba kino kuketukosesha kutwajijila mubulumbuluke bwetu nekwikala bamukoyo wakutaya mbila ya Bufumu mukulonda Nkambo yetu Yesu Kilishitu, byonse bino satuleta lukumo kwi Yehoba.—Fili. 1:9-11.