Lwitabilo Lwetu Lwitutundaika Kwingila Mingilo Yawama
1 Lwitabilo lwatundaikile ba Nowa, Mosesa, ne Lehaba kwingila mingilo yawama. Nowa wafiikile bwato. Mosesa wakaine kwikala mukipango kya Felo nakwiyowa bintu byapakakimye kacheche. Lehaba wafile banabalume bobatumine nakwendela ntanda kabiji wakokejile nemikambizho yobamukambizhe, nekupulusha bamunzubo yanji. (Hebe. 11:7, 24-26, 31) Lwitabilo lwetu lwitutundaika kwingila ñanyi mingilo yawama muano moba etu alelo?
2 Kusapwila: Lwitabilo lwitutundaika kwamba pe Lesa wetu wawama nelunengezho lwalusekelo loanengezha lwamyaka nemyaka. (2 Ko. 4:13) Kimye kimo, twakonsha kukankazhama kusapwila. Bino umvwe ‘twamubika Yehoba ku meso etu moba onse,’ witukosesha nemoyo yensetu upwa. (Sala. 16:8) Kepo lwitabilo lwetu lwitutundaika kusapwila mambo awama kubalongo betu, bakwetu mukinkalankulo, botwingila nabo, botufunda nabo, nebakwabotu pakimye kyonse kyafwainwa.—Loma 1:14-16.
3 Kupwila Pamo: Kutanwa kukupwila kimye kyonse kemwingilo mukwabo wawama ufuma mulwitabilo. Mujishindaka? Kutanwa kukupwila kumwesha lwitabilo lwetu lwakuba’mba Yesu tuji nanji kupichila mumupashi wazhila wa Lesa umvwe twapwila pamo pakupwila kwabwina Kilishitu. (Mat. 18:20) Kumwesha byotusaka ‘kumvwa bintu byamba mupashi ku bipwilo.’ (Lum. 3:6) Tumvwina mikambizho yotutambwila, mambo lwitabilo lwetu lwitukwasha kumvwisha kuba’mba ubena kwitufunjisha ke Yehoba, Mufunjishi Mukatampe.— Isa. 30:20.
4 Bintu Byotufuukula Kuba: Kuketekela mubintu bibula kumweka kwitutundaika kutangizhako bintu byakumupashi mubwikalo bwetu. (Hebe. 11:1) Kino javula kivwangamo kukana bintu byakumubiji. Kyakumwenako, mukulumpe umo mukipwilo wakaine kifulo kyapeulu kyobamupele pankito mambo wayukile’mba kikamulengela kubula kutanwa kukupwila, kushanga kisemi kyanji bunke, nekuleka mwingilo wanji wabupainiya. Twayai neatweba tuketekele mumulaye wamu Baibolo wakuba’mba Yehoba ukebapa bikebewa aba ‘basambila kukebesha bufumu bwanji, ne bololoke bwanji.’—Mat. 6:33.
5 Mwingilo mukatampe wingila lwitabilo mubwikalo bwetu kechi ukapwilamotu kwakubula kumumona kubakwetune. Kwakubula nangwa kuzhinaukatune, lwitabilo lwetu lwaya nkuwa mwaya ntanda yonse. (Loma 1:8) Onkao mambo, twayai atweba bonse tumweshe namingilo yetu yawama kuba’mba lwitabilo lwetu lumi.—Yako. 2:26.