Bamweshainga “Banabanshiwa” Butemwe
1 Yehoba ye “shanja babulwa shabo.” (Sala. 68:5) Kijikila kyanji kyabwikalo bwabo kiji muuno mukambizho yeapele mukoka wabena Isalela bakala amba: “Kechi mukayanjishe mwanamukazhi wafwilwa nangwa mwana wanshiwa ne. Inge mwibayanjisha, ke banjijile, kine nkomvwa kujila kwabo.” (Lupu. 22:22, 23) Kabiji mu Mizhilo ya Lesa mwajinga nelunengezho lwakukwasha bantu bauno mutundu mubintu byakumubiji byobakajijilwe. (Mpitu. 24:19-21) Mulunengezho lwabwina Kilishitu, bapopweshi bakine bakambizhiwa “kupempula banabanshiwa ne banabakazhi bafwila mu malwa abo.” (Yako. 1:27) Twakonsha kulonda byepi butemwe bwa Yehoba boatemwa aba babena kukomena mubisemi byansemi wabula mwina kwanji nangwa mubisemi muji baya mubupopweshi bungi?
2 Kufunjisha Kumupashi: Umvwe mwinsemi wabula mwina kwenu nangwa muji namukwenu wamumasongola wabula kwitabila, kyakonsha kukatazha bingi pakubatu’mba mwikalenga nalufunjisho lwa Baibolo panzubo nabaana benu kimye kyonse. Pano bino kyawama bingi kufunjishanga lufunjisho lwa Baibolo kimye kyonse kabiji lwalumbuluka mambo kino kikalengela baana benu kwendanga mujishinda jafwainwa, kabiji bakakoma namaana. (Mana. 22:6) Kabiji kyanema bingi kwisambanga nabaana benu bintu byakumupashi kimye kyonse. (Mpitu. 6:6-9) Kimo kimye, mwakonsha kulefuulwa, pano kwikilekane. Lombai kwi Yehoba kuba’mba emukoseshe, nekwimutangijila pa ‘kukomesha [baana benu] na kwibafunjisha ne kwibajimuna monka mwaswila aye Nkambo.’—Efi. 6:4.
3 Umvwe mukeba kwimukwashako mumingilo yenu yamu Binembelo, babulai bakulumpe mukipwilo lukatazho lwenu. Bakonsha kwimubulako mashinda mwakubila nangwa kwimukwasha kwikala namutanchi wakimye kyonse wabyakumupashi wabamunzubo yenu.
4 Bakwabo Byobakonsha Kukwashañana: Mukitota-myaka kitanshi, Timoti waikele kekalume wamukoyo wakwa Yehoba nangwa kyakuba wakomejilenga munzubo mwajinga bantu bayanga mubupopweshi bungi. Kwakubula nangwa kuzhinaukatune mukoyo wajinga nabainanji nebankambo yanji wakumufunjisha binembelo byazhila kubwanyike bwanji kwamukwashishe bingi. (Byu. 16:1, 2; 2 Timo. 1:5; 3:15) Kabiji wamwenejilemo nemukupwañena pamo nabena Kilishitu bakwabo, kuvwangakotu nemutumwa Paulo, awo watelele Timoti amba “mwanami mwi Nkambo wakishinka, ye natemwa.”—1 Ko. 4:17.
5 Nelelo jino, byokiwamapo umvwe balongo nebanyenga bakoma kumupashi batemwa banabanshiwa bakalombwana nebakashimbi baji mukipwilo! Abya mwibatela bonse pajizhina pajizhinanyi? Nanchi mwisamba nabo pakupwila kwabwina Kilishitu nepabimyetu bikwabonyi? Ingijilainga pamo nabo mumwingilo wamubujimi. Kimo kimye mwakonsha kwibetako pamo nansemi yabo wabula mwina kwanji nangwa nsemi waitabila kuba’mba mufunjile nabo pamo lufunjisho lwenu lwakisemi nangwa kukaila pamo makayo awama. Umvwe bano banyike kebemumone anweba nobe mwibalunda nabo, bakalonda byubilo byenu byawama nekutundaika komukebatundaikanga.—Fili. 2:4.
6 Yehoba watemwa bingi banabanshiwa bakalombwana nebakashimbi, kabiji witupesha bingi pamingilo yawama yotwingila yakwibakwasha kufunda bukine. Bavula bobakomesha kunsemi yabo wabula mwina kwanji nangwa bakomena munzubo muji baya mubupopweshi bungi baumvwijile luno lutundaiko kabiji kino kimye babena kwingila mubukishinka mwingilo wabupainiya, bankwasho mukipwilo, bakulumpe mukipwilo, bakulumpe benda, bamishonale, nangwa baji mukisemi kya Betele. Twayai atweba bonse tumonepo mashinda mwakwikela na “muchima wetu wabaya” wakukwasha banabanshiwa, mukulonda Shetu wamwiulu.—2 Ko. 6:11-13.