Kwikela Mwayila Kwipana Kwetu
1 Kwakubula nangwa kuzhinaukatune, kana mwabatizwe kalanyi, inyi kana katataka muvuluka bingi joja juba janema mubwikalo bwenu. Lubatizhilo lwetu kechi yompelone, bino yontendekelo yakupana bumi bwetu kwingila mwingilo wamyaka nemyaka. (1 Yoa. 2:17) Kwikela mwayila kwipana kwetu kwalumbululaka?
2 Kulonda Kilishitu: Aku ubatizwatu, Yesu ‘watatwile kufunjisha,’ kusapwila “mambo awama a bufumu bwa Lesa.” (Luka 3:23; 4:43) Popamotu neatweba, kimye kyotumwesha kwipana kwetu kwi Yehoba mulubatizhilo ponkapo twikala bamwingilo batongolwa kusapwila mambo awama. Nangwa kyakuba kimye kyabaya nengovu yetu yakonsha kupwila mukukeba bintu byakumubiji, bino mwingilo wetu mukatampe kemwingilo wabwina Kilishitu. (Mat. 6:33) Mukifulo kyakukabakana nakukeba bunonshi nekutumbalala, bantu bepana kwi Lesa bakebesha ‘kutumbijika mwingilo wabo,’ byonka byaubile mutumwa Paulo. (Loma 11:13) Nanchi mwanemeka jishuko jenu jakwingijila Yehoba nekwibikako nakutumbijika mwingilo wenunyi?
3 Byonka byaubile Yesu neatweba twakonsha ‘kumukana Diabola.’ (Yako. 4:7) Satana waesekele Yesu panyuma yalubatizhilo Lwanji, kabiji neano moba etu alelo unankama bakalume bakwa Yehoba bepana. (Luka 4:1-13) Byotwazhokolokwa nantanda yakwa Satana, twafwainwa kwikanya atweba bene, kuchina kiji kyonse kyakonsha konauna ndangulukilo yetu nekulama muchima wetu kuchina kongolokela kubintu byatama. (Mana. 4:23; Mat. 5:29, 30) Bena Kilishitu bakambizhiwa kuba’mba kechi ‘bakonsha kuja ku tebulu wa Nkambo ne ku tebulu wa bademona pamo ne.’ (1 Ko. 10:21) Kino kikebewa kwilama atweba bene kubyakisangajimbwe byabula kufwainwa, kwendañana nababi, kabiji nekutamba byubilo byatama byapa Intaneti. Kabiji twafwainwa kuchinuzhuka byambo byabasenduka mulwitabilo. Kwilama kubino bintu nebyubilo byabujimuku bikwabo byakwa Satana kuketukwasha kwikela mwayila kwipana kwetu.
4 Ingijishainga Bintu Bitupa Lesa: Pakuba’mba tukonshe kwikela mwayila kwipana kwetu, Yehoba witupa bukwasho bwa Byambo byanji nekupwila kwabwina Kilishitu. Tangainga jonse Baibolo nekulomba kwi Yehoba. (Yosh. 1:8; 1 Tesa. 5:17) Sekelai mukupwila kwakipwilo. (Sala. 122:1) Pwañanainga naboba bakamwa Yehoba nekulama byatongolwa byanji.—Sala. 119:63.
5 Yehoba ukemukwasha kwikela mwayila kwipana kwenu nekumwingijila nalusekelo myaka nemyaka.—Sala. 22:26, 27; Fili. 4:13.