Abya Mubena Kwikala Mwayila Kwipana Kwenu Nyi?

“Byonse byo muba, nangwa ki ka, nangwa ki ka, ubai na muchima yense, nobe kwi [Yehoba, NW] kechi ku bantu ne.”—KOLOSE 3:23.

1. Bantu bakaya bisela batako byepi muchima ku bisela byabo?

NANCHI bantu bakaya bisela nabiji mpila ya kumaulu, ya tenesi, basiketibo, basebo, banyema kapeela, gofu nangwatu bisela bikwabo, bashinda byepi? Bashinda inge batako muchima ne kusaka kuyuka bulongo kisela kyo basala. Patanshi bakosesha mubiji ne kutako muchima. Nanchi kutako muchima kwa uno mutundu ko kotwafwainwa kuvulukanga inge twalanguluka pa kwipana byo kulumbululwa mu Baibolo?

2. “Kwipana” kulumbulula ka mu Baibolo? Ambai kyakumwenako.

² “Kwipana” kulumbulula ka mu Baibolo? “Kwipana” kulumbulula kyambo kya Kihebelu kilumbulula “kwizhijika; kwifumyako nangwa’mba kwifingisha.”a Kala mu bena Isalela, Ñanga Mukatampe Alona wavwalanga kitebo pajinga “munchinya wazhila” walengelwe na kyela kya ngolode yawamisha, panembelwe byambo bya Kihebelu’mba “Wazhila wa Yehoba.” Kino kyavululangako ñanga mukatampe kuchiina bintu byakonsha kuzhilulula tente wazhila ‘mambo manyi a Lesa wanji a kumushinga mu kumuzhijika ajinga pe aye.’—Kulupuka 29:6; 39:30; Bena Levi 21:12.

3. Kwipana kwanema byepi mu bwikalo bwetu?

³ Twamona kuba’mba kwipana ke kintu kyanema bingi. Muntu wipana wafwainwa kwiyukanyikisha aye mwine’mba muzha wa Lesa, kabiji wafwainwa kwikala na byubilo byawama. Onkao mambo, kyanema bingi kumvwisha byambo bya Yehoba byaambile mutumwa Petelo amba: ‘Mwikale bazhila mambo ne amiwa nazhila.’ (1 Petelo 1:15, 16) Byo tuji bena Kilishitu bepana tuji na mutembo mukatampe wa kwikala mwayila kwipana kwetu, kwikala bakishinka kufikatu ne kumpelo. Bika bikwabo biji mu kwipana kwa bwina Kilishitu?—Bena Levi 19:2; Mateo 24:13.

4. Kikala byepi pa kuba’mba twipane, kabiji kwakonsha kwesakanyiwa ku ñanyi kintu?

⁴ Pa nyuma ya kuyuka Yehoba Lesa, milaye yanji ne mwingilo wa Yesu Kilishitu mu ino milaye, twipaine atweba bene kwingijila Lesa na muchima wetu yense, na maana etu onse ne bulume bwetu bonse. (Mako 8:34; 12:30; Yoano 17:3) Kwipana kwetu kuji nobe luchipo lotwalayañene na Lesa lwa kubula kulubako. Kwipana kwetu kechi kwajinga kwa kupulumukatu ne. Twikilangulukile-langulukilengapo mu michima yetu ne kwikibika mu lulombelo. Onkao mambo, kechi kintu kya ka kimye kachechetu ne. Kechi twafwainwa kwikala nobe muntu wakwata kujima, bino ko kyakayanga wabwela wikileka kampe mambo a kuchina nkito nangwa kuzhinauka’mba kechi nkafikwako kobikapila ne. Twayai tumone bya kumwenako bya bantu bamo ‘bakwata pulao’ mu mwingilo wa teokalasi bino saka baji mu makatazho.—Luka 9:62; Loma 12:1, 2.

Kwipana Kwabo Kechi Bekukaine Ne

5. Yelemiya wajinga byepi kya kumwenako kya kalume wipana kwi Lesa?

⁵ Mwingilo wa kwa Yelemiya wa bungauzhi mu Yelusalema, kechi wajinga mwingilo wapela ne. Waingijile uno mwingilo kukila pa myaka 40. (kutatula mu 647 kufika mu 607 B.C.E.) Wayukile papelejile bulume bwanji. (Yelemiya 1:2-6) Pa juba pa juba, wafwainwe kuchinchika ne kukoselamo pa kutalañana na bena Yuda bakosele mitwe. (Yelemiya 18:18; 38:4-6) Nangwa kyajinga byonkabyo, Yelemiya waketekejile mwi Yehoba Lesa, awo wamukoseshe kuba’mba ekale kalume wa kine wipana kwi Lesa.—Yelemiya 1:18, 19.

6. Ñanyi kintu kyo twakonsha kumwenako ku byaubile Yoano?

⁶ Nga mutumwa wakishinka Yoano yebapangijile ku jikuji jakatazha ja Patamosa “na mambo a mambo a Lesa ne a busapwishi bwa Yesu,” kyajinga byepi? (Lumwekesho 1:9) Wachinchikile ne kwikala mwayila kwipana kwanji kwa bwina Kilishitu pa myaka nobe 60. Wajingako kukilatu ne pa kyokya kimye nzhita ya bena Loma po yaonawine Yelusalema. Wajinga na jishuko ja kunemba Mambo awama. Wanembele makalata asatu ne buku wa Lumwekesho muji kimwesho moamwene nkondo ya Amagedonyi. Abya wabwelele pa nyuma byo ayukile kuba’mba Amagedonyi kechi ikeya mu moba a bumi bwanji nenyi? Walekele kutako muchima nyi? Ine, Yoano wakosejile mu bukishinka kufikatu ne ku lufu saka ayuka kuba’mba nangwa ‘kimye kyafwenyenye ke pepi,’ kufikizhiwa kwa kimwesho kyanji kwajingatu kwalepa.—Lumwekesho 1:3; Danyela 12:4.

Byakumwenako bya Ano Moba bya Bantu Bepana

7. Mulongo umo wajingabyepi kya kumwenako kya kwipana kwa bwina Kilishitu?

⁷ Mu moba etu a lelo, bena Kilishitu bakishinka bavula bekala mwayila kwipana kwabo saka babambakana nangwa kya kuba’mba kechi bapuluka kala nkondo ya Amagedonyi ne kwimwena byoiji ne. Umo wa uno mutundu ke Ernest E. Beavor ku England. Waikele Kamonyi mu 1939 kuntendekelotu ya Nkondo ya Kibiji ya Ntanda yonse. Wikilekele busulu bwanji bwa kukopa bipikichala pa kuba’mba engilenga mwingilo wa kimye kyonse. Pa kubula kwivwanga mu bya bumulwila ntanda na mambo a bwina Kilishitu bwanji, bamutaile pa kaleya myaka ibiji. Kisemi kyanji kyamukoseshenga bingi. Mu 1950 baana banji basatu baile na kufunda ku Sukulu ya Baibolo ya Gileada ya Watchtower, ifunjisha bumishonale, mu New York. Mulongo Beavor wabambakene bingi mu mwingilo wanji wa busapwishi kya kuba bakwabo bamwitanga’mba Ernie Amagedonyi. Waingijile mwayila kwipana kwanji, na kutaya mbila ya nkondo ya Lesa ya Amagedonyi yafwenya kala pepi, kufikatu ne ku lufu lwanji mu 1986. Kechi wamwene kwipana kwanji kwi Lesa kwikala kwa pa ka kimye kachechetu ne!b—1 Kolinda 15:58.

8, 9. (a) Bansongwalume bavula bamwesheshe byepi kya kumwenako mu Spain kimye Franco kyo alaminenga kyo kya kyalo? (b) Mepuzho ka o twafwainwa kwishikisha?

⁸ Ku Spain nako kwafumine kyakumwenako kikwabo kya mingilo yawama. Kimye Franco kyo alaminenga kyalo kya Spain (kutatula mu 1939 kufika mu1975), Bakamonyi bakyanyike bavula na mambo a bwina Kilishitu bwabo kechi bevwangile mu bya bumulwila ntanda ne. Bavula baikele myaka jikumi ne kukilapotu mu tuleya twa bashilikale. Umo Kamonyi wa jizhina ja Jesús Martín bamupele mambo avula bingi alengejile kumutaya pa kaleya myaka 22. Bamupuminenga kya kufwa kimye kyo bamukashijile mu kaleya ka bashilikale ku Kabeta ka Buyeke bwa Africa. Kino kechi kyapeelele ne, bino washinjile luno lukatazho.

⁹ Javula bano bansongwalume kechi bayukile kimye kya kwibakasulwilamo ne, mambo bebazhachishenga javula bingi saka bakiji mu kaleya. Bino nangwa kyajinga byonkabyo, basungile bulumbuluke bwabo ne kubambakana mu mwingilo aku sabakiji mu kaleya. Mu 1973 bintu byo byatendekele kuwaminako, bano Bakamonyi bavula saka baji mu myaka ya kusemwa 30, bebakasulwile mu kaleya. Kepo kwakubula ne kutaya kimye ne, batwelele mu mwingilo wa kimye kyonse. Bamo baikele bapainiya beikajila bakwabo nabo baikele ke bapaina benda. Baikejile mwayila kwipana kwabo kimye kyo bajinga mu kaleya, kabiji bavula batwajijila byonkabyo kufumatu kimye kyo bebakasulwile.c Nga atweba lelo jino? Abya kwipana kwetu kwa kishinka nobe bano bantu ba kishinka?—Bahebelu 10:32-34; 13:3.

Byo Twafwainwa Kumona Kwipana Kwetu

10. (a) Twafwainwa kumona byepi kwipana kwetu? (b) Yehoba umona byepi mwingilo wetu kwi aye?

¹⁰ Kwipana kwetu kwi Lesa kwa kuba kyaswa muchima wanji twikumona byepi? Abya kyo kintu kyanema mu bwikalo bwetu nyi? Kechi na mambo a bwikalo bwetu ne, kana twibanyike, bakikote, baji mu masongola nangwa babula mu masongola, bakosa nangwa bakolwa, twafwainwa kwibikako kwikala mwayila kwipana kwetu monka mwapelela bwikalo bwetu. Bwikalo bwa muntu bwakonsha kumuswisha kwingila mu mwingilo wa kimye kyonse wa bupainiya, kwipana kwingijila pa ofweshi wa musampi wa Watch Tower Society, bumishonale nangwa mu mwingilo wa kwenda. Lubaji lukwabo, bansemi nabo bafwainwa kwingila na ngovu mu kukokozhezha kisemi kyabo bya ku mubiji ne bya ku mupashi. Inge twingila maawala acheche mu mwingilo pa ñondo pa ñondo, nanchi twakonsha kwiamona’mba akepa ku meso a Yehoba kwesakanya na oa engila uji mu mwingilo wa kimye kyonse nyi? Ine. Lesa kechi witukebela byotwabula ne. Mutumwa Paulo wanembele kino kuba’mba: “Umvwe kuswa ko kuji, kya bupe kitabilwa monka mwayila byo aji nabyo muntu, kechi mwayila byo abula nabyo ne.”—2 Kolinda 8:12.

11. Muka motukamwena lupulukilo?

¹¹ Kechi tukamwena lupulukilo mu kiji kyonse kyo twakonsha kuba ne, posotu monka mu lusa lwa Yehoba kupichila mwi Yesu Kilishitu, Nkambo yetu. Paulo walumbulwile bingi bulongo kino amba: “Bonse balenga mambo, kabiji bapelelelatu ne kufika ku lukumo lwa Lesa ne; pa kubinga bebabingishatu ku bupe bwanji monka mu bukuzhi bwa mwi Kilishtu Yesu.” Byonkabyo, mingilo yetu yoimwesha lwitabilo lwetu byo lwakosa mu milaye ya Lesa.—Loma 3:23, 24; Yakoba 2:17, 18, 24.

12. Mambo ka otwafwainwa kubula kwesakanyanga mingilo yetu ku ya bakwetu?

¹² Kechi kitufwainwa kwesakanya kimye kyo twingila mu mwingilo wa Lesa, nangwa mabuku alumbulula Baibolo otushila bantu, nangwa mafunjisho a Baibolo otuji nao ku a bakwetu ne. (Ngalatiya 6:3, 4) Nangwatu twingile byepi mu mwingilo wa bwina Kilishitu, atweba bonse twafwainwa kuvulukanga bino byambo bya kwikepesha byaambile Yesu amba: “Byonkabyo ne anweba, pa kupwisha kuba byonse byo mwakambizhiwa, mukambe’mba, Twi bakalume batu; twauba kyonkakya kyo twafwainwa kuba.” (Luka 17:10) Bimye binga byo twakonsha kwamba’mba twapwisha “kuba byonse” byo twakambizhiwa? Onkao mambo jipuzho ke jino, Twafwainwa kwimonga byepi mu mwingilo wetu kwi Lesa?— 2 Kolinda 10:17, 18.

Pa Juba pa Juba Ubaipo Kimo

13. Ñanyi mulanguluko ye twafwainwa kwikala nanji mu mingilo ya kwipana kwetu?

¹³ Pa nyuma ya kufunda bakazhi, balume, baana, bansemi ne bazha, Paulo wanembele bino’mba: “Byonse byo muba, nangwa ki ka, nangwa ki ka, ubai na muchima yense, nobe kwi [Yehoba, NW] kechi ku bantu ne; byo mwayuka’mba, Kwi [Yehoba] mukatambula mfweto, bo buswanyi: ye Nkambo Kilishitu ye mwingijila.” (Kolose 3:23, 24) Kechi tubena kwingijila bantu amba bamone mingilo yetu mu mwingilo wa Yehoba ne. Tubena kweseka kwingijila Lesa mu kulondela kya kumwenako kya kwa Yesu Kilishitu. Waingijile mwingilo kimye kicheche kyoajinga nakyo saka ayuka ene mambo o afwainwe kwingijila bukiji-bukiji.—1 Petelo 2:21.

14. Petelo wasopeshe ka pa mambo a moba a kupelako?

¹⁴ Mutumwa Petelo naye wamwesheshe mambo a kwingila bukiji-bukiji. Mu nkalata yanji ya bubiji, wasopeshe kuba’mba mu moba akapelako kukekala ba mwenga—basenduka mu lwitabilo ne baluzhinauko. Kwesakana na milanguluko yabo abo bene, bakonsha kuzhinauka kwikala kwa Yesu pa bufumu. Onkao mambo, Petelo waambile amba: “Aye Nkambo kechi wabanda ku mulaye wanji, byo balanguluka bamo mambo a kubanda ne; pakuba wimutekenya muchima, byo abula kusaka nangwa umo onaike ne, poso amba bonse balapile. Bino juba ja Nkambo jikeya nobe ngivi.” Ee, juba ja Yehoba jikeya. Onkao mambo, kyo kintu kyo twafwainwa kulangulukangapo pa juba pa juba ne kumona lwitabilo lwetu mu milaye ya Lesa byo lwakosa.—2 Petelo 3:3, 4, 9, 10.

15. Twafwainwa kumonanga byepi juba ne juba mu bwikalo bwetu?

¹⁵ Pa kuba’mba twikale mwayila kwipana kwetu mu jishinda jafwainwa, twafwainwa kuba bintu bya kutota Yehoba pa juba pa juba. Pa kuzhika juba, kyawama kutala lunyuma ne kwishikisha amba, nanchi mu jishinda jimo naingilapo kimo kya kutumbijika jizhina ja Lesa ne kutaya mbila ya mambo awama a Bufumu? Apo kampe mu byubilo byawama, mu misambo ya kwikomesha nangwa butemwe bwetu na kisemi ne bakwetu. Abya twajikwingijisha kimye kyo twajinga nakyo kubulako bakwetu luketekelo lwetu lwa bwina Kilishitu? Twakwashapo umo kulangulukisha pa milaye ya Lesa nyi? Twayai twingilengapo mwingilo umo wanema wa ku mupashi pa juba pa juba, wakwikomesha ubatu nobe twibikila nsabo—Mateo 6:20; 1 Petelo 2:12; 3:15; Yakoba 3:13.

Ilamainga

16. Mu ñanyi mashinda Satana moesekela kubwezha pa nyuma kwipana kwetu kwi Lesa?

¹⁶ Tubena kwikala mu bimye byakatazha kya kine ku bena Kilishitu. Satana ne bantu banji beseka kuvulañanya lupusano luji pakachi ka byubilo byawama ne byatama. (Loma 1:24-28; 16:17-19) Wingijisha byo tutamba pa TV nangwa pa Intaneti mu kubindankanya michima yetu. Milanguluko yetu ya ku mupashi ivulañana nangwa kukankalwa kuyuka bya bujimuku byanji. Umvwe twazhilulula mafunde etu a ku mupashi, kwipana kwetu kwakonsha kubwela pa nyuma kepo ne kukwata “pulao” nzenzekela.—Luka 9:62; Filipai 4:8.

17. Lujimuno lwa kwa Paulo lwakonsha kwitukwasha byepi kulama bulunda bwetu na Lesa?

¹⁷ Onkao mambo, byambo bya kwa Paulo ku bena Tesalonika byafwainwa bingi pa kino kimye: “Kino kyo kyaswa muchima wa Lesa, kya kuzhijikwa kwenu, muzhile bulalelale; kabiji amba anweba bonse pa muntu pa muntu, muyuke mwa kwimwena bakazhi benu anwe bene monka mu buzhile ne mu buneme, kechi mu kusakasaka kwa lwiso kubindankanya muchima pamo ne Bagentila babula kuyuka Lesa ne.” (1 Tesalonika 4:3-5) Bamo baleka kuba bintu mwayila kwipana kwabo kwi Lesa betumpa mu bulalelale, bapangiwa mu kipwilo kya bwina Kilishitu. Bakepesha abo bene bulunda bwabo na Lesa, ne kumulengulula mu bwikalo bwabo. Paulo kyo kyo aambijile kuba’mba: “Lesa kechi witwichile ku bubipisho ne, kana mu kuzhijikwa. Onkao mambo aye ulengulula, kechi ulengulula muntu ne, ulengulula Lesa, yenkaye wimupa Mupashi wanji Wazhila.”— 1 Tesalonika 4:7, 8.

Mwasakisha Kubapo Ka?

18. Twafwainwa kusaka kubapo ka?

¹⁸ Twafwainwa kubapo ka umvwe twatesha muchima ku kwipana kwetu kwi Yehoba Lesa? Twafwainwa kwikala na muchima watoka too mu byubilo byetu ne mu mwingilo wetu. Petelo wakambizhe’mba: ‘Mwikale na michima yatoka, amba, monka mo mwanenenwa bibi, balengeshiwe bumvu aba bebunena bibi bwikalo bwenu bwawama bwa mwi Kilishitu.’ (1 Petelo 3:16) Kimo kimye twakonsha kuyanda ne kunenwa bibi mambo a byubilo byetu bya bwina Kilishitu, byonka byajinga Kilishitu mambo a lwitabilo lwanji ne bukishinka bwanji kwi Lesa. Petelo waambile’mba, “byonkabyo kabiji aye Kilishitu byo amanamine mu mubiji, anweba nenuwa ivwikai bya nkondo na muchima wa byonkabyo mambo aye wamanama mu mubiji ye waleka kulenga mambo.”—1 Petelo 4:1.

19. Kyawama bantu saka bamba’mba ka pe atweba?

¹⁹ Ee kine, kusakisha kwikala mwayila kwipana kwetu kuketulamawizha ku tukose twa ino ntanda ya Satana yabela ku mupashi, mu byubilo, ne ku mubiji. Bino kukilatu ne pa kino. Tukashiinwa kuba’mba twi bantu baitabizhiwa kwi Lesa, kintu kyawamisha kukila byonse byakonsha kupana Satana ne bantu banji. Onkao mambo, kechi kyafwainwa kwambiwa kotuji’mba twaleka butemwe bwa kine botwajinga nabo kimye twayukile bukine ne. Kyambiwe kotuji byonka byo kyaambiwe ku bajinga mu kipwilo kya Tiyatila mu myaka-kitota kitanshi’mba: “Nayuka mingilo yobe, ne butemwe bobe, ne lwitabilo lobe, ne mwingilo wobe wa bukwasho, ne butekanye bobe, ne mingilo yobe yapelako byo yavula kukila itanshi.” (Lumwekesho 2:4, 18, 19) Ee kechi twafwainwa kubatu kyambazhi mu kwipana kwetu ne, bino twayai twikale na “muchima wa lupata,” kasa twabambakana kufikatu ne kumpelo mambo yafwenya kala ke pepi.—Loma 12:11; Lumwekesho 3:15, 16.

[Tubyambo twa mushi]

Mukivuluka Nyi?

• Bika bikwabo biji mu kwipana kwa bwina Kilishitu?

• Ñanyi bya kumwenako byawama bya bakalume ba Lesa ba kala ne ba ano moba byo twafwainwa kumwenako?

• Twafwainwa kumumona byepi mwingilo wetu kwi Lesa?

• Twafwainwa kusakisha kubapo ka pa mambo a kwipana kwetu kwi Lesa?

[Kipikichala pa peja 24]

Yelemiya wajinga wa kishinka nangwa kyakuba wamanaminenga

[Kipikichala pa peja 25]

Ernest Beavor wajinga kyakumwenako baana banji

[Kipikichala pa peja 26]

Bakamonyi bakyanyike bavula bajinga mu tuleya ku Spain basungile bulumbuluke bwabo

[Bipikichala pa peja 27]

Twayai twingilengapo mwingilo umo wanema wa ku mupashi pa juba pa juba