Twayai Tusunge Bulongo Mapunzha Etu po Tupwila
1. Nzubo ya Bufumu ingijishiwa ku bintu ka?
1 Kuzhokoloka mwaya ntanda yonse, bipwilo bya Bakamonyi bakwa Yehoba byakila 94,000. Bipwilo byavula bingijisha Nzubo ya Bufumu mpunzha ya mpopwelo ya kine, kufunjilamo Baibolo ne kwisambilamo misambo ya bwina Kilishitu.
2. Mambo ka o kyanemena kusunga Nzubo ya Bufumu na butooto saimwekana ya manono?
2 Mutanchi wa Kuwamisha Jonse: Mwingilo wingijiwa wa kuwamisha Nzubo ya Bufumu ke lubaji lumo lwanema bingi mu mwingilo wetu wazhila. Buku wa Abateyanishiwa pa peja 61-2, waamba’mba: “Balongo byo bakwashako kupana bupe bwa mali a kuwamishisha Nzubo ya Bufumu, bafwainwa kuyuka ne kuba’mba ke jishuko bingi umvwe abo bene kebepane kwingila mwingilo wa kwiiwamisha kuba’mba imwekenga ya butooto, ya manono, kabiji yapita mwela. Monse mukachi ne pangye, Nzubo ya Bufumu yafwainwa kwikala yawama bulongo mu kwimenako jibumba ja Yehoba.” Nzubo ya Bufumu byo ingijishiwa javula mulungu ne mulungu, kikebewa kimye kyonse kwiiwamishanga ne kwiilungishanga pafwafwafwa. Javula ba mingilo ba kwitemenwa bapwila mu ino Nzubo ya Bufumu kikale kipwilo kimo nangwa bipwilo byavula, bo bengila uno mwingilo. Byonkatu byo kyajinga mu kimye kyanembejilwengamo Baibolo, ne lelo jino twafwainwa kutako muchima ku “kulungisha ne kuwamisha” mpunzha yetu potupwila.—2 Moba. 34:10.
3. Mwingilo wa kuwamisha Nzubo ya Bufumu wafwainwa kutanchikwa byepi, kabiji bañanyi bakonsha kwingilako uno mwingilo?
3 Mutanchi wa mazhina a ba kuwamisha Nzubo ya Bufumu wafwainwa kulamikwa pa kipabi kya mabulañano. Kyakumwenako, mabumba a lufunjisho lwa buku akonsha kutanchikwa kuba’mba awamishenga Nzubo ya Bufumu mulungu ne mulungu kulondela mutanchi watanchikilwa jimo wa bintu bibena kukebewa kwingijilapo. Aba bonse betemenwa kwingila, bakonsha kuba kebevwangemo mu kuwamisha Nzubo ya Bufumu kubiwa mulungu ne mulungu pa kuba’mba imwekenga bulongo. Baana nabo bafwainwa kwingijila pamo na bansemi yabo mu uno mwingilo wa kuwamisha Nzubo ya Bufumu, mu kuba bino bebafunjisha bya kumwesha lusanchilo mu uno mwingilo wawama wa kukwasha bakwabo. Kikatakata umvwe Nzubo ya Bufumu ingijishiwa na bipwilo byavula, kyanema bingi kukwatankena pamo mu kuwamisha ino Nzubo ya Bufumu, kino kilengela mutembo kubula kunemenenatu ku bantu bacheche bonka.
4. Bika byafwainwa kubiwa pa kuba’mba kipwilo kiyuke byakuba umvwe kekiwamishe Nzubo ya Bufumu?
4 Mutanchi panembwa bintu bibena kukebewa kuwamishiwa wafwainwa kulamikwa kikatakata musungiwa biñambañamba bya kuwamishishako. Uno mutanchi pafwainwa kunembwa mingilo yafwainwa kwingijiwa mulungu ne mulungu nabiji kupyanga, kulambwizha panshi, kuwamisha bipenze, kupukuta lukungu peulu ya kitala pa kutambwila mabuku, kupoya bimbotela mwakutaya biswaswa, ne bikwabotu. Mingilo imo kechi ikebewa kwiingila kimye kyonse ne, nabiji kupolesha bipona bya mapulanga, mipando, ne kusokaika malaichi. Muchi yense ye mwingijisha kuwamishishako, mwafwainwa kumutula pa mpunzha pakuba banyike kuba bamutola ne, kabiji mwafwainwa kunembapo bulongo peulu sabimweka amba ye muchi ujimo.
5. Kwizhikijila kwanemena ka, kabiji bintu ka bikebewa kupikitanga pa kimye pa kimye? (Monai kabokoshi kaji pa peja 4.)
5 Kyanema bingi kwizhikijila kuchina mapuso kubiwa pa Nzubo ya Bufumu. (Mpitu. 22:8) Pa kyo kino, kabokoshi kaji mu uno mutwe kamwesha bintu bikebewa kupikitanga pa kimye pa kimye kuchina mapuso.
6. Mwingilo wa kuwamisha Nzubo ya Bufumu utangijilwa byepi?
6 Kuwamisha Nzubo ya Bufumu: Jibumba ja bakulumpe mu kipwilo baji na mutembo wa kumona Nzubo ya Bufumu po ibena kukebewa kuwamisha. Javula, mukulumpe umo mu kipwilo nangwa nkwasho utongolwa kutangijila uno mwingilo. Ye unengezha mingilo ya kwingila pa juba pa juba pa Nzubo ya Bufumu, kumona kuba’mba yasungiwa butooto kabiji ituntulu ne kumona kuba’mba bintu byakwingijisha byonse po biji. Kyanema bingi kumona’mba monse mukachi ne pangye ya Nzubo ya Bufumu kafwapo bintu byakonsha kuleta mapuso ne. Umvwe bipwilo bibiji nangwa byavula bingijisha nzubo ya Bufumu imo, mabumba a bakulumpe mu bipwilo bafwainwa kutongolapo kometi ya kunengezha bya kulama Nzubo ya Bufumu ne kumona’mba mpunzha yonse yasungiwa bulongo. Ino kometi itangijilwa na mabumba a bakulumpe mu bipwilo. Mukulumpe wa kijiiji ye upitulukamo kumona mwingilo wa kulungisha Nzubo ya Bufumu byo aenda apa bino watuma uno sawakya ku ofweshi ya musampi.
7. (a) Bika byubiwa pa mwaka pa mwaka mu kusunga Nzubo ya Bufumu ituntulu? (b) Bintu ka bikebewa kumonwanga pa kimye pa kimye? (Monai kabokoshi kaji pa peja 5.)
7 Pa mwaka pa mwaka kwikala kupesapesa Nzubo ya Bufumu yonse, kabiji panyuma ya bino kwikala kutuma sawakya ku ofweshi ya musampi. Bakulumpe mu kipwilo bo baji na mwingilo wa kunengezha mutanchi wa kulungisha bulongo ponse paonaika. Basapwishi bakonsha kwibeta kwiya na kukwasha kulungisha paonaika. Bonse bafwainwa kuteshako muchima kumona paji ponse paonaika nangwa pakepetu byepi pafwainwa bukiji bukiji kuwamishapo.
8. Kimye ka bakulumpe mu kipwilo kyo bafwainwa kunembela ba Kingdom Hall Construction Desk umvwe paji bimo byo babena kukeba kuwamisha?
8 Umvwe bakulumpe mu kipwilo bakeba kwipuzhako bimo nangwa bakeba bukwasho pa kulungisha Nzubo ya Bufumu, bafwainwa kunembela ba Kingdom Hall Construction Desk ne kwibabula. Kino kyavwangamo makatazho nabiji umvwe musemi ubena kunoka nangwa umvwe muba kinyanzhinyanzhi. Pano biji tumilala tucheche, ne nkitotu ikwabo icheiche ya kulungisha ne kuwamisha, yafwainwa kwingijiwa na kipwilo.
9. Mutanchi ka wafwainwa kulondelwa umvwe kubena kukebewa kwitako muntu wa kwiya na kwingila nkito?
9 Kwingijisha Mali a Kipwilo Bulongo: Mingilo yavula ya mu Nzubo ya Bufumu ne pa lubanza, ingijiwa na ba mingilo bepana. Kwipana kwabo mu kwingila uno mwingilo kumwesha butemwe bwa kine kine kabiji kukwasha bingi kukepeshako mali ataiwapo. Umvwe kibena kukebewa kwita muntu wa kwiya na kwingilako nkito imo, nabiji kusansa muchi wa kwipaya tulongolo, kuwamisha mipaipi nangwa malaichi, bakulumpe mu kipwilo bafwainwa kwita sendwe wayukisha kwingila yoyo nkito na manono. Saka bakyangye kumwita ne, patanshi bafwainwa kunemba nkito yonse ibena kukebewa kwingijiwa ne biñambañamba bibena kukebewa kwingijisha. Mutanchi wa bino bintu bibena kukebewa kuwamisha wafwainwa kutumiwa ku mashitolo akatampe apusana pusana apotesha bino bintu kuba’mba bebabule mutengo. Panyuma ya kutambwila mapepala panembwa mitengo kufuma ku ano mashitolo akatampe, bakulumpe mu kipwilo bafwainwa kumona shitolo yawama kupotamo. Uno mutanchi wafwainwa kulondelwa nangwa kyakuba mulongo ye wipana kwingila mwingilo nangwa kuleta biñambañamba byonse bibena kukebewa pa mutengo watongolwa.
10. Kika kyafwainwa kubiwa pa kumona’mba mali a kipwilo abena kwingijishiwa bulongo?
10 Umvwe bipwilo byavula bingijisha Nzubo ya Bufumu imo, kometi itangijila mwingilo pa Nzubo ya Bufumu yafwainwa kupusanya maakaunti a bipwilo ne kupananga pepala wa sawakya wa mali pa ñondo pa ñondo ku jibumba jimo jimo ja bakulumpe mu kipwilo kuba’mba bayukenga bibena kwingijishiwa mali. Bakulumpe mu kipwilo baji na mwingilo wa kumona kuba’mba mali a kipwilo abena kwingijishiwa bulongo.
11. Bika byafwainwa kubiwa umvwe Nzubo ya Bufumu ibena kukebewa kuwamishiwa yonse?
11 Kuwamisha Nzubo ya Bufumu Yonse: Umvwe kometi itangijila mwingilo pa Nzubo ya Bufumu yamona’mba pajipo mwingilo mukatampe ubena kukebewa kwingijiwa ku Nzubo ya Bufumu, yafwainwa kwipuzha jibumba ja bakulumpe mu kipwilo kuba’mba bebabule bya kuba. Umvwe batana amba mwingilo ubena kukebewa kwingijiwa wabaya, nangwa inge babena kukeba kwibakwashako ku bipwilo bikwabo bibula kwingijisha yoyo Nzubo ya Bufumu, bakulumpe mu kipwilo bafwainwa kutuma nkalata ku ba Kingdom Hall Construction Desk kulumbulula mwingilo yense ubena kukebewa kwingijiwa. Bano balongo bayuka kwingila uno mwingilo bulongo bafuukula bintu byakonsha kwimukwasha kabiji batangijila bingi bulongo bya kwingila mwingilo. Umvwe pa bena kukebewa mali avula, kyakonsha kuwama bingi kubajila jimo kibelengelo kya mali kibena kukebewa ne kwitabanzhañana na kipwilo.
12. Twakonsha kumwesha byepi lusanchilo lwetu lwa jishuko jotuji najo ja kupwila mu Nzubo ya Bufumu?
12 Kine tusanta bingi pa kwikala na jishuko ja kupwila pamo mu Nzubo ya Bufumu! Kechi tukeba kulekelela kupwila kwetu nangwa kubula kwikunemeka ne. Atweba bonse twakonsha kwivwangamo mu kutundaika uno mutanchi wa kupwila pamo na kwikosesha atweba bene na bene kupichila mu kwingila na ngovu mu mwingilo wa kuwamisha Nzubo ya Bufumu. Kino kitumbijika mpopwelo ya kine ne kupana lukumo ku jizhina ja Yehoba. Twayai atweba bonse twibikeko kusunga mpunzha yetu po tupwila bulongo.
[Kitenguluzha pa peja 4]
Bya Kulamanga Nzubo ya Bufumu ne Kuwamisha Mpunzha Yonse
◻ Pangye: Nanchi musemi, bintu byalengwa na mapulanga, penchi, bipenze bya nzubo, ne kipabi panembwa’mba Nzubo ya Bufumu, bijitu bulongo byonse nyi?
◻ Lubanza: Abya lubanza lwawamatu bulongo nyi? Nga tumashinda, masakwa, ne pa kwimikila myotoka bijitu bulongo nyi?
◻ Mukachi: Nanchi bipona, malaichi, lubumbulu, mwa kutuula mabuku, ne bibamba bikwabo bijitu bulongo nyi?
◻ Biñambañamba: Nanchi biñambañamba bya kwambilamo bijitu bulongo nyi?
◻ Byolonyi: Nanchi byolonyi byasungiwa butooto kabiji bibena kwingilatu bulongo nyi? Nga mulola moaji nyi?
◻ Mafwailo a kipwilo: Nanchi mapepala a kipwilo ajitu bulongo nyi?
[Kitenguluzha pa peja 5]
Mutanchi wa Bintu Bikebewa Kumonanga pa Kimye ne pa Kimye wa Kuzhikijila Mapuso
◻ Byakuzhimako mujilo byafwainwa kwikela pakuba mwibimona bukiji umvwe paikala mujilo.
◻ Pa bibelo pafwainwa kwikala patooka bulongo, kabiji pafwainwa kuyukanyikwa bukiji amba po pa kulupukila.
◻ Bibamba byonse byafwainwa kwikala bya butooto, kubika bintu po byafwainwa kwikala, ne kumona’mba kafwamo bintu byambuka bukiji mujilo ne, kabiji ne kutaya biswaswa byonse.
◻ Mwafwainwa kumutalatalanga musemi ne kumuwamisha jonse.
◻ Tumashinda ne pa kwimikila myotoka kechi pafwainwa kwikala bintu byakonsha kulengela muntu kutezhimuka ne kupona ne.
◻ Ntambo ya malaichi yafwainwa kwiitalatalanga javula ne kwiiwamisha bulongo kumona kuba’mba kafwako ntambo yakashiwa nzenzeleka nangwa kwiikasa pabula kufwainwa ne.
◻ Ponse pabena kunoka pafwainwa kuwamishiwa bukiji bukiji kuba’mba mubule kwikala kinyanzhinyanzhi.
◻ Nzubo ya Bufumu yafwainwa kwiikiya umvwe kafwapo bantu.
◻ Mipompi ya mema, mipaipi, ne byolonyi byafwainwa kuwamishiwa bulongo.