Anweba Banyike, Alai Kitendekesho Kyawama kya Myaka Ikeya
1. Mambo ka bena Kilishitu banyike o bakebewa kwikala na lwitabilo lwakosa?
1 Bintu ka byanema kwi anweba? Bintu ka byo mulangulukapo? Abya mulanguluko wenu waimena pa bintu bya kino kimye nyi, inyi pa bya kulutwe ne kuta muchima ku milaye ya Lesa? (Mat. 6:24, 31-33; Luka 8:14) Pa kuketekela mu milaye ya Lesa, lwitabilo lwakosa lukebewa bingi byonka byo kyamweshiwa mu byakumwenako bya ba Abalahama ne Mosesa. (Hebe. 11:8-10, 24-26) Nanchi mwakonsha kwikala byepi na luno lwitabilo ne kwala “kitendekesho kyawama kya myaka ikeya”?—1 Timo. 6:19.
2. Tufundako ka kwi Mfumu Yosiya?
2 Mukebai Yehoba: Kyawama bingi umvwe mufunjila pamo kimye kyonse na kisemi kyenu bintu bya ku mupashi. Bino kange muketekele’mba mambo muji na luno lunengezho onkao mambo lwitabilo lwakosa lukeyatu lwine ne. Pa kuba’mba mutane ‘maana a kumuyuka Lesa,’ mwafwainwa anweba bene kumukeba Yehoba. (Mana. 2:3-5; 1 Moba. 28:9) Mfumu wakyanyike Yosiya, byobyo aubile. Nangwa kya kuba wakomejilenga mu mpunzha mo babujile kuyuka kya kine bya ku mupashi, aye “watatwile kukeba Lesa wa mushakulu wanji Davida” kimye kyo ajinga na myaka ya kusemwa 15.—2 Moba. 34:3.
3. Bena Kilishitu bakyanyike lelo jino bakonsha kumukeba byepi Yehoba?
3 Mwakonsha kumukeba byepi Yehoba? Mwakonsha kumukeba kupichila mu kupesapesa bintu byo mwaitabilamo ne ‘kushiinwa’ amba mwatana bukine. (Loma 12:2) Kyakumwenako, abya mwakonsha kulumbulula Baibolo byo yaambapo pa mambo a mashi nangwa kulumbulula’mba Bufumu bwa Lesa bwatendekele kulamwa mwiulu mu 1914 nyi? ‘Kwikala na maana alumbuluka abya bukine,’ ke lubaji lumo lwanema bingi mu kwala kitendekesho kyawama kya myaka ikeya.—1 Timo. 2:3, 4.
4. Basapwishi babula kubatizwa bakonsha kumwesha byepi kuyilako palutwe kwabo?
4 Yosiya byo amukebele Lesa, wamwene bingi mfweto yawama. Saka akyangye kufikizha myaka ya kusemwa 20, wafumishemo bupopweshi bwa bubela mu kyalo kwa kubula moyo ne. (2 Moba. 34:3-7) Ne anweba, kuyilako palutwe kwenu ku mupashi kukamwekela mu bintu byo muba. (1 Timo. 4:15) Umvwe mwi musapwishi wabula kubatizwa, ibikishaiko kuba’mba musapwilenga bulongo. Kechi mwafwainwa kupelelatu mu kutambika mabuku ne. Teshai muchima ku kwingijisha Baibolo, kwipuzhañana na bantu, ne kwikala na lusekelo mu byo mwingila. (Loma 12:7) Kuba bino kukemukwasha kukoma ku mupashi.
5. Mashuko ka o baji nao bena Kilishitu babatizwa a kunungulwilamo mwingilo wabo?
5 Mupai Yehoba Byenu Byawamisha: Kimye kyo mumwesha kwipana kwenu kwi Yehoba kupichila mu lubatizhilo, mwikala ba mwingilo batongolwa na Lesa. (2 Ko. 3:5, 6) Kino kimushinkwila mashuko a kwingijila Yehoba mu mwingilo wa kimye kyonse. Mashuko nabiji bupainiya, kwingijila pa Betele, bumishonale, ne mwingilo wa kwingijila mu byalo bingi. Balongo bakulumpe mu kipwilo nangwa bankwasho bakiji bakatanda, bakonsha kunembesha kuba’mba bakatanwe ku Sukulu ya Lufunjisho lwa Mwingilo (MTS). Kabiji mashinda akwabo a kunungulwilamo mwingilo wenu ke kufunda mulaka ungi nangwa kuya na kwingijila kuji kukajilwa kukatampe.
6. Atweba bonse twakonsha kwaala byepi kitendekesho kyawama kya myaka ikeya?
6 Kya kine, kechi bonse bakonsha kwikala na jishuko ja kwingila ino mingilo ne, bino atweba bene pa muntu pa muntu twafwainwa kumupa Yehoba byetu byawamisha. (Mat. 22:37) Nangwa bwikalo bwenu bwikale byepi nangwa byepi, ingijilai Yehoba bumi bwenu bonse. (Sala. 16:5) Mu kuba bino, mukaala kitendekesho kyawama kya myaka ikeya.