Yosiya Watemenwe Mizhilo ya Lesa

Yosiya waikele mfumu saka ajitu na myaka itanu na isatu. Mu oa moba, bantu bapandanga manga ne kupopwela bankishi. Yosiya byo afikizhe myaka 16, wibikileko bingi kufunda bya kupopwela Yehoba mu jishinda jafwainwa. Byo afikizhe myaka ya kusemwa 20, watendekele kulalaula bankishi ne kukundaula bya kusokelapo bitapisho byajinga mu kyalo. Kabiji byo afikizhe myaka 26, wanengezhe kuba’mba nzubo ya Yehoba beiwamishe.

Mu nzubo ya Lesa, ñanga mukatampe aye Hilikiya, watainemo muvungilo mwajinga mizhilo ya Yehoba. Kampe ino yajinga mivungilo yanembele Mosesa. Munembeshi wa mfumu aye Shafwana watwajile uno muvungilo kwi Yosiya ne kumutangila Mizhilo yajingamo na jiwi ja peulu. Yosiya watelekelenga, popo ayukile kuba’mba bantu balekele kukookela Yehoba pa myaka yavula bingi. Mfumu Yosiya waambijile Hilikiya amba: ‘Yehoba wazhingijila bingi. Yanga ukambe nanji. Yehoba usakwitubula byo twafwainwa kuba.’ Yehoba wakumbwile luno lulombelo kupichila mu ngauzhi wa mukazhi aye Hulada amba: ‘Bena Yuda bankana. Bakebakambula, bino kechi mu moba a mfumu Yosiya ne, mambo aye wipelula bingi.’

Mfumu Yosiya byo aumvwine bino byambo, wayile ku nzubo ya Lesa ne kwita bena Yuda bonse. Kepo ebatangijile Mizhilo ya Yehoba na jiwi ja peulu. Yosiya ne bantu balayile’mba bakakokelanga Yehoba na muchima yense.

Bena Yuda balekele kwikala na Kijiilo kya Lupitailo pa myaka yavula bingi. Bino Mizhilo yatangile Yosiya yaambile’mba bafwainwe kwikalanga na Kijiilo kya Lupitailo mwaka pa mwaka. Yosiya waambijile bantu amba: ‘Tukekala na Kijiilo kya Lupitailo kya Yehoba.’ Yosiya wanengezhe milambo yavula bingi ne banyimbi bakwimba mu nzubo ya Lesa. Kepo mukoka yense baikele na Kijiilo kya Lupitailo, bino palondela Kijiilo kya Bashinkwa Bakubula Mbizho kya moba atanu na abiji. Kufumatu kimye kyajingako Samwela, kechi kwajingapo Kijiilo kya Lupitailo nobe kino ne. Yosiya watemenwe bingi Mizhilo ya Lesa. Nanchi umvwa bulongo kufunda pe Yehoba nyi?