Ikalai ba Michima ya Kusanta
1 Nangwa kya kuba tuji mu “bimye byakatazha,” tuji na bishinka byavula bya kumusanchila Yehoba. (2 Timo. 3:1) Kitanshi pa bino byonse ke kya bupe kyanema kya Mwananji ye etupa. (Yoa. 3:16) Kikwabo, aba baji mu bupopweshi bwa bubela byo babena kufwa nzala ya ku mupashi, atweba twiyowa kajo kavula ka ku mupashi. (Isa. 65:13) Tuji mu bwanabwankazhi bwa ntanda yonse kabiji twapewa jishuko jikatampe bingi kwingila mwingilo wawama wa kutwala mpopwelo ya kine palutwe. (Isa. 2:3, 4; 60:4-10, 22) Twakonsha kumwesha byepi lusanchilo lwetu kwi Yehoba pa bintu byawama byo etupa?—Kolo. 3:15, 17.
2 Mwingilo wa Lusekelo: Byo aambilenga pa mambo a kupana bintu bya ku mubiji, mutumwa Paulo wanembele’mba: “Lesa watemwa upana na lusekelo.” (2 Ko. 9:7) Jino jifunde jingila ne ku mwingilo wetu kwi Lesa. Lusanchilo lwetu lumwekela mu kukebesha bukine, lusekelo lo twikala nalo pa kupwila kwa bwina Kilishitu, mukoyo wetu mu mwingilo wa mu bujimi, ne lusekelo lo tuji nalo pa kuba kyaswa muchima wa Lesa.—Sala. 107:21, 22; 119:14; 122:1; Loma 12:8, 11.
3 Kala ku bena Isalela, Mizhilo kechi yabikile kipimo kyatongwelwa jimo kya kupainamo milambo imo ne. Mupopweshi yense wamweshanga lusanchilo lwanji kupichila mu kupana ‘monka mo akonsheshe, mwayijile bibusa bya Yehoba’ byo atambwijile. (Mpitu. 16:16, 17) Byonkabyo ne lelo jino, muchima wa lusanchilo uketutundaika kwingila papelela bwikalo bwetu mu mwingilo wa kusapwila Bufumu ne kulenga baana ba bwanga. Javula kimye kya kisalo kwikala kimye kyabaya bingi kya kumwesheshamo lusanchilo lwetu. Bamo batambula moba ku nkito nangwa ku mingilo ikwabo kuba’mba bekaleko na kimye kyabaya kya kwingila mu mwingilo wa mu bujimi, nangwa kwingilakotu ne bupainiya bwa kukwasha. Nanchi mwakonsha kubaishako mwingilo wenu nyi?
4 Kuvuzha Kusanta: Jishinda janema jo tumwesheshamo lusanchilo lwetu kwi Yehoba ke kupichila mu lulombelo. (1 Tesa. 5:17, 18) Byambo bya Lesa bitutundaika ‘kuvuzha lwitabilo na kusanta.’ (Kolo. 2:7) Kikale twatabankana nangwa tuji na bijikila, kimye kyonse twafwainwa kubikangamo ne lusanchilo mu milombelo yetu ya juba ne juba. (Fili. 4:6) Ee kine, kupichila mu mwingilo wetu ne mu milombelo yetu, twayai ‘tuvuzhenga sante kwi Lesa.’—2 Ko. 9:12.