“Ikalai ba Michima ya Kusanta”
1 Yesu byo abukile banabalume jikumi bambumba, pajingatu umo wabwelele kwi aye na kusanta. Yesu wamwipwizhe’mba: “Nanchi kechi baji jikumi babukwa nenyi? pakuba batanu na bana bepi?” (Luka 17:11-19) Byo kyawamapo ne atweba kwikala bakusanta pa bintu byonse byawama ne bya bupe byonse byalumbuluka bitupa mpanyi kabiji Shetu wa mwiulu wa butemwe, aye Yehoba Lesa!—Kolo. 3:15; Yako. 1:17.
2 Bintu ka bimo byo etupa byo twafwainwa kumusanchila? Tumusanchila bingi pa mambo a bukuzhi, mambo bo bupe bukatampe Lesa bo apana ku bantu. (Yoa. 3:16) Kabiji tusanchila Yehoba pa kwitufwenyesha kwipi ne aye. (Yoa. 6:44) Lukwatankano lwetu lwa bwina Kilishitu nalo lwitulengela kumusanchila pakatampe bingi. (Sala. 133:1-3) Mwakonsha kulangulukilapo ne bya bupe bikwabo byavula byo etupa Yehoba. Kechi tukeba kwikala byajinga bena Isalela babujile lusanchilo bavulaminenga mingilo Yehoba yo ebobijilenga ne!—Sala. 106:12, 13.
3 Mweshainga Lusanchilo: Nangwa kya kuba aba banabalume jikumi bambumba kampe basanchijiletu mu michima yabo pa bibobijile Yesu, pajingatu umo wamwesheshe lusanchilo. (Luka 17:15) Ne atweba tumwesha lusanchilo lwetu kupichila mu kwingilako pakatampe mu mwingilo. Umvwe ketusante kya kine pa bintu byonse bitubila Shetu wa mwiulu wa butemwe, michima yetu ikatundaikwanga kulonda butemwe ne bumpanyi bwanji kupichila mu kubulako bantu pe aye. (Luka 6:45) Umvwe ketubuleko bakwetu pa mambo a ‘mingilo ya kukumya ya Yehoba ne milanguluko yanji yo etulangulukila,’ butemwe ne lusanchilo lwetu pe Yehoba bikabayilako.—Sala. 40:5.
4 Kwashainga Bantu Kumwesha Lusanchilo: Twafwainwa kumonangapo mashinda a kukwashishamo baana betu ne bo tufunjisha Baibolo kumweshanga lusanchilo. Bansemi baji na mashuko avula bingi a kubilamo bino, nabiji umvwe babena kumona bilengwa bya Yehoba na baana babo. (Loma 1:20) Pa kufunjisha lufunjisho lwa Baibolo, twakonsha kushikisha ye tubena kufunjisha amba, “Nanchi kino kishinka kitufunjishapo ka pa mambo a bumuntu bwa Yehoba?” Umvwe lusanchilo lwa ye tufunjisha Baibolo ke lubayileko, butemwe bwanji bwa kutemwa Lesa ne muchima wa kusaka kumutokesha pa muchima, nabyo bikabayilako.
5 Mu ano moba apelako, bavula baji na muchima wa kubula kusanta. (2 Timo. 3:1, 2) Byo kimusangajikapo Yehoba kumona bakalume banji saka bamwesha lusanchilo kupichila mu kwingilako pakatampe mu mwingilo!—Yako. 1:22-25.