Londai Buchibamambo Bwaoloka bwa Yehoba

¹ “Yehoba watemwa buchibamambo bwaoloka.” (Sala. 37:28) Onkao mambo, nangwa kya kuba wakambizha’mba ino ntanda ibi ikonaunwa, patanshi wakinengezha kuba’mba lujimuno lupanyiwe. (Mako 13:10) Kino kyapana kimye ku bantu kuba’mba balapile ne kupuluka. (2 Pe. 3:9) Nanchi twibikako kulonda buchibamambo bwaoloka bwa Yehoba nyi? Nanchi bya malwa ne buyanji bwa bantu bitulengela kwibasapwila pa mambo a luketekelo lwa Bufumu nyi? (Mana. 3:27) Kutemwa buchibamambo bwaoloka kuketutundaika kwingilako na ngovu mwingilo wa kusapwila.

² Sapwilainga kwa Kubula Kutala ku Bilungi: Umvwe ketuyukanyikishe nkebelo ya Lesa ku bantu bonse kwa kubula kutala ku bilungi ne, ko kuba’mba tubena “kuba byaoloka.” (Mika 6:8) Twafwainwa kuchinuzhuka kwikala na milanguluko ya bumbulwakoloka ya kuzhachisha bantu na mambotu a mwekelo yabo. (Yako. 2:1-4, 9) Yehoba “ye wasaka’mba, bantu bonse bapuluke, bakayukishe bya bukine.” (1 Timo. 2:4) Byambo bya Lesa bya bukine byakonsha kupimpula bingi bwikalo bwa bantu. (Hebe. 4:12) Kuyuka kino kishinka kwakonsha kwitutundaika kusolomoka bantu na luketekelo, nangwatu boba bakaine kutelekako kimye kya kunyuma.

³ Nyenga umo waingilanga mu shitolo waumvwanga bingi moyo na mambotu a mwekanyikilo ya muntu umo waiyanga jonse na kupota bintu. Nangwa byonkabyo, kimye kikwabo waesekele kumusapwila pa mambo a milaye ya Lesa ya Paladisa. Aye ponkapo wafikenejiletu kukumbula’mba, kechi waitabila mu mashimikila a bubela ne, kabiji ne kuba’mba mvwajilo yanji yajingatu ya bukonyebukonye kabiji wingijisha bizhima. Bino uno nyenga kechi wikilekele ne. Juba jimo uno mwanamulume waipwizhe uno nyenga amba ambepo pa byoamwenenga nsuki yanji yalepa, nyenga walumbulwile bingi bulongo Baibolo byo yaamba pa mambo a kino. (1 Ko. 11:14) Juba jalondejilepo uno nyenga wakuminye bingi pa kumona’mba uno mwanamulume watenda myevu yanji ne kwipipisha nsuki yanji bulongo! Walombele’mba bamufunjishenga lufunjisho lwa Baibolo. Nyenga wanengezhezhe ne kubula mulongo kuba’mba amufunjishenga. Uno muntu wanungulukile bingi bulongo kya kuba wipaine ne kubatizwa. Byonka byajinga uno mwanamulume, ne bavula babena kwingijila Yehoba ano moba basanchila bingi boba baji na mukoyo bebafunjishe mambo a Bufumu kwa kubula kutala ku bilungi ne.

⁴ Yehoba katatakatu akafumyepo bumbulwakoloka panopantanda ponse. (2 Pe. 3:10, 13) Mu kino kimye kicheche kyashalako, twayai tulonde buchibamambo bwaoloka bwa Yehoba kupichila mu kujimuna bonse kuba’mba banyeme lonaiko lubena kwishila ino ntanda ibi ya kwa Satana.—1 Yoa. 2:17.