Kabokoshi Ka Mepuzho

◼ Muntu wakonsha kutambula byepi makope a Kyamba kya Usopa ne Loleni! anji mwine?

Byo kiji kuba’mba lunengezho lwa kunembesha Kyamba kya Usopa ne Loleni! byabula pa tepu nangwa biji pa tepu lwapwile kala, basapwishi bonse bafwainwa kutambula magazini abo abula pa matepu ne aji pa matepu mu kipwilo monka mobaji. Kanatu magazini ne matepu a Bampofu o onkatu atumwanga kwa kubula kulipilisha ku boba bafwainwa kutambwila. Mwane yukai’mba bipwilo byafwainwa kuoda magazini aji pa tepu kwingijisha pepala ya Oda ya Kipwilo (M-202). Ino pepala mwakonsha ne kwiingijisha kuodelapo mabuku a mu Mulaka ungi, aji mu bisopelo bikatampe ne mabuku a kwamba na Maboko.

Umvwe muntu uji mu nyaunda yenu wakeba kumutwajilanga magazini kimye kyonse, mwane teshaiko muchima kuba’mba mutwalengatu jonse kwa kubula kupuswapo kope nangwa imo ne. Bantu bapangiwa mu kipwilo bakonsha kuya po batambwila magazini nangwa mabuku akwabo pa Nzubo ya Bufumu ne kutambulako a kwingijisha abo bene. Basapwishi kechi bafwainwa kutwalanga magazini ku bantu bapangiwa mu kipwilo ne.

Oda wa kunembesha mabuku ukatwajijila kulondelwa mu mafwailo aji ku ofweshi wa musampi ke wa boba bo babula kutwajila mabuku ku basapwishi mu kipwilo. Umvwe Kometi ya Mwingilo mu Kipwilo yatuma oda wa mabuku a muntu ubula kutambwila, munembeshi wafwainwa kunembako tubyambo tucheche twa kulumbulula’mba kuno kunembesha kwapitulukwamo bulongo ne kwitabizhiwa na Kometi ya Mwingilo mu Kipwilo.

Kino kyalumbulula’mba basapwishi kechi bafwainwa kunembela ku ofweshi wa musampi ne kuoda mabuku abo ne. Umvwe basapwishi nangwa bantu baji na lusekelo lwa kufunda bukine batuma oda wabo wa mabuku ku ofweshi wa musampi, uno oda wabo ukabwela ku kipwilo.

◼ Muntu ye bakasa mu kaleya wakonsha kutambula byepi magazini anji?

Umvwe kipwilo kingila mwingilo wa kusapwila mu yoyo nyaunda yaikelamo kaleya kipana magazini ku boba baji mu kaleya, ko kumvwa’mba, awa uji mu kaleya wafwainwa kutambulako magazini a Kyamba kya Usopa ne Loleni! kupichila mu basapwishi bafwakesha yoyo mpunzha. Umvwe kino kyashupa, awa uji mukaleya wafwainwa aye mwine kunembesha kupichila mu kunembela ku ofweshi wa musampi. Mwane yukai’mba ne boba bantu bapangiwa mu kipwilo baji mukaleya nabo bakonsha kutambulako magazini abo byonka byo kyalumbululwa mu ino palagalafu.