Kwashai Bantu bo Mufunjisha Baibolo Kumvwisha ne Kusanchila Byubilo bya Yehoba Byawamisha
1 Mu mwingilo wetu wa kusapwila ne kulenga baana ba bwanga, kechi tufunjishatu bantu bukine butanshi bwa mu Baibolo ne. Tukwasha bantu kuyuka bulongo Yehoba kabiji ne kwibalengela kumvwisha ne kusanchila byubilo bya Yehoba byawamisha. Umvwe bantu bakishinka bafunda bukine pe Lesa, kibakwasha bingi. Kabiji kibalengela kuba lupimpu mu bwikalo bwabo pa kuba’mba ‘bendenga mwafwainwa Nkambo mwa kumutokesha ku muchima to.’—Kolo. 1:9, 10; 3:9, 10.
2 Kingijisho Kyetu kya Bukumo kya Kufunjishishamo: Kufumatu ku ntendekelo, buku wa Baibolo Ufunjisha walumbulula bingi bulongo byubilo bya Yehoba. Kitango kitanshitu kyakumbula mepuzho a kuba’mba: Nanchi Lesa kine wimuta muchima nyi?, Nga Lesa uji byepi?, ne bwa kuba’mba Nanchi kyakonsheka kufwenya kwipi ne Lesa nyi? Kabiji kitango kintutu kimo kyaamba ne pa buzhile bwa Yehoba (pala. 10), bololoke ne kifyele kyanji (pala. 11), butemwe bwanji, (pala. 13), bulume bwanji (pala. 16), lusa lwanji, bibusa, kuswila jimo kulekela mambo, butekanye, kabiji ne bukishinka (pala. 19). Palagalafu 20 yapezhako na byambo bya kuba’mba: “Umvwe mwatwajijila na kufunda pe Yehoba, popo akekala wa kine kwi anweba, kabiji kikemulengela kumutemwa ne kwiumvwa bafwenya kwipi ne aye.”
3 Twakonsha kwingijisha byepi buku wa Baibolo Ufunjisha kukwasha bafunda Baibolo kufwenya kwi Yehoba? Panyuma ya kufunda palagalafu imo yaamba pa byubilo bya Lesa, twakonsha kwipuzha ubena kufunda amba, “Nanchi kino kimufunjishapo amba ka pe Yehoba byo aji?” nangwa amba “Nga kino kimwesha byepi kuta muchima Lesa ko emuta anweba?” Kupichila mu kwingijisha ano mepuzho kimye kyonse kyo mubena kufunda, kikwasha bo tubena kufunjisha kulanguluka languluka pa bintu byo babena kufunda ne kwibakwasha kwikala na muchima wa kumvwisha ne kusanchila byubilo bya Yehoba byawamisha.
4 Ingijishai Kabokoshi ka Kupitulukamo: Pa kupwisha kitango kyonse, ipuzhai ubena kufunda kwamba mu byambo byanji mwine pa kishinka kyonse kiji mu kabokoshi ka kuba’mba “Baibolo byo Afunjisha.” Isambai pa binembelo byamweshiwa. Pa kuba’mba muyuke biji mu muchima wa ubena kufunda, mwakonsha kwipuzha amba, “Mwiumvwa byepi pa mambo a bifunjisha Baibolo pa kino kishinka?” Kupichila mu kuba bino, kechi mubena kukoseshatu kishinka ne, bino mubena kuyuka ne bine bintu byaitabilamo ubena kufunda. Kino kikakwasha ubena kufunda kutendeka kukomesha bulunda na Yehoba.