Nanchi Mwakonsha Kutwela mu ‘Kibelo Kikatampe kya Kwingijilamo Mingilo Nyi’?
1. Ñanyi ‘kibelo kikatampe kya kwingijilamo mingilo’ kitushinkukila?
1 Kimye ‘kibelo kikatampe kya kwingijilamo mingilo’ byo kyamushinkukijile mutumwa Paulo, waingijishe jino jishuko na kizaku kutundaikilamo bintu bya Bufumu nangwa kya kuba bantu bavula bamwimenejilenga kuntundwa. (1 Ko. 16:9) Lelo jino, basapwishi ba Bufumu bafika ku 642,000 mwaya ntanda, batwela mu kibelo kikatampe kya kwingijilamo mingilo kupichila mu kwikala bapainiya ba kimye kyonse.
2. Mambo ka o kyawamina kwipesapesa atwe bene pa kimye ne kimye?
2 Bintu Byaluka: Nangwa kya kuba bwikalo bwetu bwa ano moba bwakonsha kulengela mwingilo wetu kubwela panyuma, bino bintu byaluka. Onkao mambo, kyawama bingi kwipesapesa atwe bene pa kimye ne kimye kwa kubula kupembelela’mba kanatu bwikalo bukawame. (Sapwi. 11:4) Nanchi mwi wakyanyike uji pa bwipi kupwisha sukulu wa ku sekondale nyi? Abya mwi nsemi uji na baana baji pepi kutendeka kuya ku sukulu nyi? Nanchi muji pa bwipi na kutambula penshonyi nyi? Kuno kwaluka kwa bintu kwakonsha kwimulengela kwikala bakasuluka ne kwimulengela kutendeka mwingilo wa bupainiya bwa kimye kyonse. Nyenga umo wabelabelanga mu kimye kya kunyuma, wafuukwilepo kunembesha bupainiya kimye kyo ajinga na myaka 89. Mambo ka? Ke na mambo a kuba walangulukile’mba wakonsheshe kwingilako bupainiya byo kiji kuba’mba bamufumishe mu kipatela ne kwikala ku nzubo kukila pa mwaka umo.
3. Bamo baalula byepi mitanchi yabo pa kuba’mba bengilenga bupainiya bwa kimye kyonse?
3 Paulo aye patanshitu wafuukwilepo bya kuya na kufwakesha balongo banji mu Kolinda. Nangwa byonkabyo, waalwile mitanchi yanji na mambo a kusapwila mambo awama. Lelo jino bavula babena kwingila bupainiya bwa kimye kyonse, baalwile mitanchi yabo yavula pa kubatu’mba bengilenga bupainiya. Bamo nabo bapeezhako bwikalo bwabo kya kuba basalapo kutwelatu ka kakito kapela ka kumwenamo bya kwikwashishamo ku mubiji. Kabiji batana bingi lusekelo mu mwingilo wabo. (1 Timo. 6:6-8) Bamulume ne mukazhi bamo bapimpulako bwikalo bwabo kupichila mu kumvwañana’mba mwanamulume engilengako nkito kabiji ne kushinkwila mwanamukazhi jishuko ja kwingilako bupainiya.
4. Twakonsha kuba byepi umvwe ketwizhinauke’mba kechi twakonsha kufikizha maawala akebewa ne?
4 Kechi mwafwainwa kufikenatu ponkapo kukana mulanguluko wa kwingilako bupainiya na mambo a kuchina’mba kechi mwakonsha kufikizha maawala akebewa ne. Maawalatu acheche kukila pa abiji o akebewa pa juba. Umvwe mubena kwizhinauka’mba kechi mwakonsha kuba bino ne, esekai kwingilako bupainiya bwa kukwasha pa ñondo umo nangwa babiji, bino saka mwibikila kikonkwanyi kya kufikizha maawala 70. Kino kikemukwasha kutompa pa lusekelo lwa bupainiya. (Sala. 34:8) Isambai na boba babena kwingila bupainiya pa kino kimye. Apo kampe nabo bashinjilepo makatazho o mubena kutalañana nao. (Mana. 15:22) Lombai kwi Yehoba kuba’mba emukoseshe kubaishako mwingilo wenu.—1 Yoa. 5:14.
5. Mambo ka kwingila bupainiya bwa kimye kyonse o kwaikela mwingilo wanemesha?
5 Mwingilo wanemesha: Mu kwingila bupainiya bwa kimye kyonse mufuma mfweto yavula bingi. Kwimulengela kwikala na lusekelo lukatampe lufuma mu kukizhamo kupana. (Byubilo 20:35) Bupainiya bukemukwasha kukomenako mu kuyuka bya kwambatu bulongo Mambo a Lesa a bukine. (2 Timo. 2:15) Mukekala na mashuko avula a kumona bukwasho bwa Yehoba. (Byubilo 11:21; Fili. 4:11-13) Bupainiya bukemukwasha ne kwikala na byubilo bya ku mupashi nabiji kuchinchika kabiji kino kikemulengela kufwenyesha kwipi ne Yehoba. (Yako. 4:8) Nanchi mwakonsha kutwela mu kino kibelo kikatampe kya kwingijilamo mingilo ne kwikala painiya wa kimye kyonse nyi?