Kino kyo Kimye kya Kusapwila!
1. Mambo ka kino kimye o kyaikela kya kusapwila?
1 “Akamwai Lesa, mumupe lukumo.” Bino byambo bibena kusapwilwa “ku mikoka yonse ne ku bisaka byonse ne ku njimi yonse ne ku mitundu yonse ya bantu” na lutangijilo lwa bamalaika. Mambo ka? ‘Mambo kimye kya kije kya [Lesa] kyafika.’ Lelo jino tubena kwikala mu kyokya ‘kimye kya kije,’ kikeya kupwa pa konaunwa kwa buno bwikalo bujipo. Kyanema bingi bantu ‘ku popwela aye walengele mwiulu ne ntanda ne kalunga ne masulo a mema atupauka.’ Kafwako mwingilo mukwabo ubena kwingijiwa lelo jino wakonsha kunema nangwa kwingijiwa bukiji kukila mwingilo wa kusapwila “mambo awama a myaka ne myaka” ne. Ee, kino kyo kimye kya kusapwila!—Lum. 14:6, 7.
2. Bakalume ba Yehoba babena kumwesha byepi amba bayuka kimye kyo bajimo?
2 Pa myaka jikumi yapitapo, bakalume ba Yehoba basapwijile maawala 12 bilyonyi mu mwingilo wa kusapwila Bufumu ne kulenga baana ba bwanga. Bavula bapimpula bwikalo bwabo pakuba’mba bakonshe kwingilako kimye kyabaya mu mwingilo wa kunowa ku mupashi. (Mat. 9:37, 38) Kya kumwenako, mwaka wapwa basapwishi kukila pa 850,000 baingijilengako bupainiya pa ñondo pa ñondo. Bapainiya ba kimye kyonse bakebewa kwingila maawala 70 pa ñondo pa ñondo mu mwingilo wa kusapwila. Bino bapainiya ba kukwasha abo bakebewatu kwingila maawala 50.
3. Ñanyi lupimpu basapwishi lo boba javula pakuba’mba bengileko bupainiya?
3 Bibena Kukebewa pa Kwingila Bupainiya: Byo bayuka kuba’mba “kimye kyashalako bekikepesha kala” bapainiya bebikako kupezhako bwikalo bwabo. (1 Ko. 7:29, 31) Bakebapo mashinda a kukepeshako bintu bya kutayilapo mali kuba’mba babulenga kutaya kimye kyabaya kwingila mingilo ya ku kyalo. Kya kumwenako, bamo bavilukila mu mazubo acheche. Bakwabo basankilapo bya ku mubiji bimo byabula kufwainwa. (Mat. 6:19-21) Kabiji javula bakepeshako bya kukeba keba bya ku mubiji. Abye byonse bebyuba na mulanguluko wa kukeba kwingilangako kimye kyabaya ne kuteshako muchima ku mwingilo. (Efi. 5:15, 16) Kwibikako, kwikala na muchima wa kwipana, kabiji ne kukinka manungo mwi Yehoba mu lulombelo, kwakwasha basapwishi bavula kunengezha mutanchi wibakwasha kwingila bupainiya.
4. Mashinda ka akonsha kwimukwasha kuba’mba mukonshe kufikizha kikonkwanyi kya bupainiya?
4 Abya mwakonsha kwingilako bupainiya nyi? Mambo ka o mwabujila kwipuzha bapainiya bengila bulongo uno mwingilo byo babena kumwingila? Ingilai nabo mu mwingilo wa mu bujimi, pakuba’mba mumone lusekelo lo baji nalo. Tangai bibaba byaamba pa bupainiya biji mu mabuku etu. Ibikilai anwe bene bikonkwanyi byo mwakonsha kufikizha byakonsha kwimulengela kutendeka bupainiya. Umvwe pa kino kimye kujipo lukatazho lubena kwimulengela kubula kwingila bupainiya, mubulai Yehoba mu lulombelo luno lukatazho kabiji mulombai emukwashe kwilupwisha.—Mana. 16:3.
5. Bupainiya bwitukwasha byepi kukomeshako busendwe bwetu mu mwingilo?
5 Mfweto ne Lusekelo: Bupainiya bukomesha busendwe bwetu bwa kwamba bulongo Mambo a Lesa, kabiji kino kileta bingi lusekelo. Nyenga umo painiya wa kyanyike waambile’mba, “Kuyuka bya kwamba bulongo Mambo a Lesa a bukine ke mfweto ikatampe bingi. Kabiji umvwe ubena kwingila bupainiya, wingijisha bingi Baibolo javula. Inge naya ku nzubo ne nzubo ndanguluka pa binembelo byafwainwa mwina nzubo uji yense.”—2 Timo. 2:15.
6. Ñanyi lufunjisho lufuma mu bupainiya?
6 Bupainiya bufunjisha ne busendwe bwavula bwanema bingi bwakonsha kwitukwasha mu bwikalo. Bwakonsha kukwasha bakyanyike kuyuka bya kutanchika kimye bulongo, bya kwingijisha mali, ne bya kwikala na bantu. Bavula bekala na mweno ya ku mupashi ya bwikalo na mambotu a bupainiya. (Efi. 4:13) Kabiji javula bapainiya bekala na jishuko ja kumona bukwasho ne mfweto ifuma kwi Yehoba.
7. Bupainiya bwitukwasha byepi kufwenya kwipi ne Yehoba?
7 Bino mfweto imo ikatampe ifuma mu bupainiya ke ya kwitufwenyesha kwipi ne Yehoba. Kino kyakonsha kwitukosesha mu meseko. Nyenga wachinchikile makatazho a malwa waambile’mba: “Bulunda bwa pa muchima bonji nabo ne Yehoba na mambo a bupainiya bwandengejile kuchinchika makatazho onse o napichilengamo.” Wanungilepo mba, “Nji bingi na lusekelo pa kumona’mba naingijisha bwikalo bwa mu bukulumpe bwami kwingijila Yehoba mu mwingilo wa kimye kyonse. Kyankwasha kwipana mu mashinda o nalangulukanga’mba kuba ne engila ne.” (Byubilo 20:35) Twayai netuwa tumone mfweto byo tubena kwibikako kwingila mwingilo wanema bingi wa kusapwila.—Mana. 10:22.