‘Watokwa Awa Muntu Uchinchika mu Lweseko’
1 Bena Kilishitu bonse bafwainwa kupita mu meseko. (2 Timo. 3:12) Meseko akonsha kwishila mu mashinda apusanapusana, nabiji kubelabela, buyanji, lweseko, lumanyiko nangwa mu mashinda akwabotu. Meseko etuletela Satana aikelako kwitubwezha panyuma, kwitulengela kubula kutako muchima ku mwingilo wetu wa bwina Kilishitu nangwatu kwitulekesha kwingijila Lesa. (Yoba 1:9-11) Nga kuchinchika meseko kwakonsha kwitulengela byepi kwikala balusekelo?—2 Pe. 2:9.
2 Inengezhai Kutalañana na Meseko: Yehoba witupa Mambo anji a bukine kuvwangapo ne jishimikila ja bwikalo ne mafunjisho a kwa Yesu. Kupichila mu kumvwina byambo bya kwa Yesu ne kwibyuba, twala kitendekesho kyakosa ne kwitulengela kwinengezha kutalañana na meseko. (Luka 6:47-49) Kabiji twikala benengezha kupichila mu lunengezho lukwabo nabiji balongo ne banyenga yetu mu kipwilo, kupwila kwa kipwilo ne mabuku alumbulula Baibolo afuma ku jibumba ja kalume wa kishinka ne wa maana. Twingijisha kimye kyonse bupe bo etupa Lesa bwa lulombelo.—Mat. 6:13.
3 Yehoba witupa ne luketekelo. Umvwe twaikala na lwitabilo lwakosa mu milaye ya Yehoba, luketekelo lwetu lwikala “kimiko kya muchima kya kinetu ne kukosa.” (Hebe. 6:19) Mu kimye kya kala, mato akatampe kechi aendangatu kwa kubula kimiko nangwatu kimye kyo kwabulanga kwikala kipuupu ne. Umvwe kwaiya mvula mukatampe, kusumpa kimiko kwakonsha kulengela bwato kubula kukumpuka ne kwituta mu mabwe ku kitulu. Po pamotu, ne atweba umvwe twaikala na lwitabilo mu milaye ya Lesa luno, kiketulengela kukosa umvwe meseko akatampe etwishila. Makatazho akonsha kwiya kya kupulumukilatu. Nangwa kya kuba mwingilo wa ba Paulo ne Banabasa pa kutendeka bamutambwijile bingi bulongo mu Lisitila, bino nobe mu kukopa kwa jiso bintu byaalukile kimye kyaishile Bayudea bakajimbulushi.—Byubilo 14:8-19.
4 Kuchinchika Kuleta Lusekelo: Kutwajijila kwikala bakosa mu mwingilo nangwa kya kuba kuji babena kwitukanya, kwitulengela kwikala bakasuluka mu milanguluko. Tusekela bingi umvwe twatongolwa’mba, yetu twafwainwa kumumwena bumvu Kilishitu. (Byubilo 5:40, 41) Kuchinchika meseko kwitukwasha kukomenako bulongo mu kwikepesha, lukokelo kabiji ne kukizhamo kuchinchika. (Mpitu. 8:16; Hebe. 5:8; Yako. 1:2, 3) Kwitufunjisha kuketekela mwi Yehoba, kuketekela mu milaye yanji ne kufyama mwi aye.—Mana. 18:10.
5 Twayuka kuba’mba meseko ke a pa kakimyetu kacheche. (2 Ko. 4:17, 18) Meseko etulengela kwikala na mashuko a kumwesheshamo butemwe bwetu bukatampe pe Yehoba. Kupichila mu kwiachinchika, twakonsha kumwesha’mba byambo bya Satana bya bubela. Onkao mambo, kechi tuleka ne! “Watokwa awa muntu watekanya [uchinchika, NW] mu lweseko; mambo pa kulumbuluka ne kwitabilwa, ukatambula munchinya wa bumi.”—Yako. 1:12.