Mu Kuchinchika Mufuma Mfweto
1 ‘Mu kutekanya nangwa’mba kuchinchika kwenu mo mukamwena myeo yenu.’ (Luka 21:19) Abino byambo bya lubaji lwa bungauzhi bwa kwa Yesu byaamba pa “juba ja kupelako,” byalumbulwishatu amba mu kulama bulumbuluke bwetu twafwainwa kuketekela kupita mu meseko avula. Bino mu ngovu ya Yehoba, atweba umo umo twakonsha ‘kukoselamo ne ku mpelo’ ne ‘kupuluka.’—Mat. 24:3, 13; Fili. 4:13.
2 Luyanjisho, kubelabela, lukatazho lwa mali, ne bijikila byakonsha kuba ke bitukatazhe pa juba pa juba. Nangwa byonkabyo, kechi twafwainwa kulubamo kuba’mba Satana ubena kweseka konauna bulumbuluke bwetu kwi Yehoba ne. Juba jiji jonse jo twikala bakishinka kwi Shetu wa mwiulu tumwesha’mba twakwashako mu kukumbula yewa Wendelekañana. Byo kitekeneshapo pa kuyuka’mba “mipolo” yetu yo tujila pa kupita mu meseko kechi ilubiwako ne! Yanema bingi kwi Yehoba, kabiji bulumbuluke bwetu busangajika bingi muchima wanji!—Sala. 56:8; Mana. 27:11.
3 Kushinda Meseko: Luyanjisho lwakonsha kumwesha bukoke bwa muntu mu lwitabilo lwanji nangwa byubilo byanji byatama, nabiji kwitota nangwa kubula butekanye. Mu kifulo kya kukeba kupwisha meseko kwakubula kwingijisha binembelo, twafwainwa kumvwina lujimuno lwa mu Byambo bya Lesa lwa ‘kuleka butekanye nangwa’mba kuchinchika kwingile mwingilo wako walumbuluka.’ Mambo ka? Mambo kuchinchika meseko mu bulumbuluke kwitukwasha kwikala “balumbuluka, batuntulu.” (Yako. 1:2-4) Kuchinchika kwakonsha kwitukwasha kwikala na byubilo byawama, nabiji kukoka muchima, bibusa, ne lusa.—Loma 12:15.
4 Kwesekwa kwa Lwitabilo: Umvwe twachinchika meseko, twikala na lwitabilo lwaesekwa bulongo lwanema mu meso a Lesa. (1 Pe. 1:6, 7) Lwitabilo lwa uno mutundu lwitukwasha kwikala bashikimana kimye kyo tubena kupita mu meseko. Mu kunungapo, twakonsha kuyuka’mba twaitabilwa ne Lesa, kabiji kino kikosesha bingi luketekelo lwetu kuba’mba lwikale lwa kine.—Loma 5:3-5.
5 Mfweto yawamisha ifuma mu kuchinchika yatongolwa mu Yakoba 1: 12, paamba’mba: “Watokwa awa muntu watekanya mu lweseko; mambo pa kulumbuluka ne kwitabilwa, ukatambula munchinya wa bumi.” Onkao mambo, twayai twikale bashikimana mu kwipana kwetu kwi Yehoba, saka twaketekela’mba ukafweta ‘aba bamutemwa.’