Kwashai Balanda Kwikala na Luketekelo
1 Yesu watele bingi muchima balanda. Kwajinga bimye bimo byo ajishishe bantu kajo mu jishinda ja kukumya ne kubuka bakolwa, bino watesheshe muchima ku kusapwila “mambo awama” ku balanda. (Mat. 11:5) Ne lelo jino, mwingilo wa bwina Kilishitu watwajijila na kukwasha balanda ne bantutu bakwabo.—Mat. 24:14; 28:19, 20.
2 Luketekelo lwa Kine: Bamingilo ba mu Kilishitendomu javula bambila balanda amba bakabila bingi umvwe sabapana mali avula ku chechi. Pano bino Baibolo ufunjisha’mba Bufumu bwa Lesa bo bonkatu bukapwisha buyanji ne makatazho onse a bantu. (Sala. 9:18; 145:16; Isa. 65:21-23) Umvwe ke tukwashe balanda kuyuka bukine bwa mu Baibolo, ko kuba’mba tubena kwibapa luketekelo ne kwibakwasha ku mupashi.—Mat. 5:3.
3 Mu moba a Yesu, Bafaliseo basujile bingi balanda ne kwibatela na kyambo kya mukeyu amba ‘am-ha·’aʹrets, nangwa amba “bantu bapanshi.” Pano bino, Yesu wamonanga “mashi abo” nangwa’mba bumi bwabo kwikala ‘bwanema’ bingi. (Sala. 72:13, 14) Twakonsha kulonda Yesu ne ‘kumwesha lusa’ ku balanda kupichila mu kwibata muchima. (Mana. 14:31) Kange twambenga mukeyu ku balanda ba mukinkalankulo kyetu nangwa kuba mukose wa kwibasapwila ne. Bantu bavula babena kutambwila mambo awama a Bufumu, balanda.
4 Bakwashai Lonka Luno: Kufunjisha balanda ba mu nyaunda yetu mafunde a mu Baibolo kwibakwasha kukepeshako buyanji. Kya kumwenako, Baibolo wakanya kupendwapendwa, bisela bya lubekyo, bukope, kupepa fwanka ne byubilotu bikwabo bileta buyanji. (Mana. 6:10, 11; 23:21; 2 Ko. 7:1; Efi. 5:5) Kabiji Binembelo bitundaika kwikala bakishinka ne kwingila “na muchima umo,” mambo bino byo byubilo bikebewa ku bamwingilo. (Kolo. 3:22, 23; Hebe. 13:18) Mu kupesapesa kumo kwajingako, bakulumpe ba mingilo bavula bambile’mba, bukishinka ne bukine byo byubilo byo bakeba mu muntu ukeba kutwela nkito.
5 Yehoba watako bingi muchima ku lumanamo lwa balanda. Katatakatu Kilishitu Yesu akapokolole ‘bakajilwa babena kukeba bukwasho.’ (Sala. 72:12) Pa kino kimye tuji na jishuko ja kutekenesha bantu kuvwangakotu ne balanda na mambo a mu Baibolo a luketekelo.