Atweba Bonse Tuji na Byo Twakonsha Kupa Yehoba
1 Nanchi mwayuka’mba bantu baji na bintu byo bakonsha kupa Lesa nyi? Abela, walambwilepo banyama banji bamo bawama kwi Yehoba, kabiji ba Nowa ne Yoba nabo balambwile. (Nte. 4:4;8:20; Yoba 1:5) Pano bino, ino milambo kechi yanonkeshenga Mulenga mu jishinda jiji jonse ne, mambo aye ye mwina byonse. Bino bitapisho byamwesheshenga butemwe bukatampe bo bajinga nabo pe Lesa bano banabalume bakishinka. Ne atweba lelo jino twakonsha kwingijisha kimye kyetu, bulume bwetu ne mali etu kupelamo Yehoba ‘kitapisho kya kumutota.’—Hebe. 13:15.
2 Kimye: Byo kyawamapo ‘kupulushako kimye’ ku bintu byabula kunema kuba’mba twingilengako pakatampe mu mwingilo! (Efi. 5:15, 16) Kampe twakonsha kunengezha bintu bulongo kuba’mba twingilengako bupainiya bwa kukwasha ñondo umo mu mwaka nangwa kukilapo. Nangwa twakonsha kwikalako na kimye kikatampe kya kwingilangako mu mwingilo. Umvwe ketunungeko maminiti 30 ku kimye kyo twingila mu mwingilo mulungu ne mulungu, kiketulengelanga kunungako maawala abiji ku oa o tukelwa kufikizha pa ñondo pa ñondo!
3 Bulume bwetu: Pa kuba’mba twikale na bulume bwa kwingilangako mu mwingilo, twafwainwa kuchinuzhukanga bya kisangajimbwe ne makito amo akonsha kwitulengela kukoka kya kuba ketukankalwe kumupa Yehoba byawamisha. Kabiji kechi twafwainwa kukizhamo kwikala na bijikila byakonsha kulengela michima yetu ‘kunemenwa’ ne kwitupwishisha bulume bwetu bonse bo twakonsha kwingijisha mu kwingijila Lesa ne. (Mana. 12:25) Nangwatu kya kuba paji kintu kijitu bulongo kibena kwitulengela kwikala na kijikila, kyawama bingi ‘kutwika Yehoba bisendwa byetu’!—Sala. 55:22; Fili. 4:6, 7.
4 Bya Bunonshi: Twakonsha ne kupana bintu byetu bya ku mubiji kukwashishamo mwingilo wa kusapwila. Paulo watundaikile bena Kilishitu bakwabo’mba bafwainwa ‘kwitujila jimo bya milambo’ kimye kyonse kuba’mba kwikalenga bya kupa bakajilwa. (1 Ko. 16:1, 2) Byonkabyo, ne atweba twakonsha kutulangapo mali pa mbaji a kubingwilangako ku bibena kukebewa pa kipwilo kabiji ne ku mwingilo wa ntanda yonse. Yehoba usanta bingi pa bintu byo tupana kufuma panshi ya muchima, nangwa kya kuba a kyo kintu kichechetu.—Luka 21:1-4.
5 Yehoba witupa bintu byavula bingi. (Yako. 1:17) Tumwesha lusanchilo kupichila mu kwingijisha bulongo kimye kyetu, bulume ne bintutu bikwabo bya ku mubiji pa kumwingijila. Kuba bino, kutokesha Yehoba pa muchima “mambo Lesa watemwa upana na lusekelo.”—2 Ko. 9:7.