Komenaingako mu Busapwishi Bwenu

¹ Shetu wa mwiulu utemwa bingi umvwe bakalume banji ke bakomeneko ku mupashi. Kino kyavwangamo kukomenako mu maana ne kwikala musapwishi wafikilamo kusapwila mambo awama. Paulo watundaikile kalama aye Timoti kutwajijila kwibikishako na kutanga ne kufunjisha kuba’mba, kuya palutwe kwanji kumweke ku bonse. (1 Timo. 4:13-15) Atweba bonse twafwainwa kwibikangako kwikala basapwishi bayuka kufunjisha bulongo nangwatu boba babandamo mu uno mwingilo.

² Ibikilai Bikonkwanyi: Kukomenako ku mupashi kukebewa kwibikila bikonkwanyi. Bikonkwanyi ka bimo byo twakonsha kwibikila? Twakonsha kwibikila kikonkwanyi kya kukeba kuyukisha bya kwingijisha bulongo mpoko yetu ya ku mupashi, Baibolo. (Efi. 6:17) Kampe kujipo mbaji imo ya mwingilo yo tukeba’mba twiingilenga bulongo, nabiji busapwishi bwa mu mukwakwa, bwa pa foni nangwa kwingijila mu nyaunda ya busulu. Kampe tukeba kuyuka bya kwamba bulongo pa kubwelako ku bantu bo twisambile nabo. Kikonkwanyi kikwabo kyawama kwibikila ke kya kukeba kuyuka bya kutendeka ne kufunjisha mafunjisho a Baibolo.

³ Bya Kwitukwasha: Kupwila kwa kipwilo, kikatakata Sukulu wa Mwingilo wa Lesa ne Kupwila kwa Mwingilo kwanengezhiwa kwitukwasha kukomenako mu mwingilo wa busapwishi. Umvwe ke twibikeko kunengezha bulongo ne kutanwa ku kuno kupwila kabiji ne kwingijisha mashinda a kwambilamo ambiwa, kiketukwashanga bingi.—2 Ko. 9:6.

⁴ Kabiji twafwainwa ne kwikwashanga atwe bene na bene kukomenako. (Mana. 27:17) Kutelekesha bulongo ku bibena kwamba bakwetu bo tubena kwingila nabo mu mwingilo kuketukwasha kuyuka bya kusapwila. Kunungapo, mukulumpe wetu wa lufunjisho lwa buku wakonsha kwitukwasha umvwe kekikebewe. Byo jijipo jishuko ja kwingila na painiya nangwa musapwishi wapijilwa wa kwitukwasha kwingila bulongo kabiji ne kwikala na lusekelo mu mwingilo! Nanchi mu jibumba ja lufunjisho lwetu lwa buku mujipo musapwishi wakatataka nyi? Kampe twakonsha kumwambila’mba tukengile nanji.

⁵ Mwingilo wa bwina Kilishitu wa busapwishi, ke mwingilo wakilamo kunema pa mingilo yonse ibena kwingijiwa lelo jino. Byo tupa Yehoba “kitapisho kya kutota,” tukeba kumupa byawamisha. (Hebe. 13:15) Umvwe saka twibikishako kukomenako mu mwingilo wa busapwishi, tukekala bamwingilo ‘babula ne kya kubilako bumvu, kasa twambatu bulongo mambo a bukine.’—2 Timo. 2:15.