Kufunjisha Bakatataka bya Kusapwila
1. Mwaumvwine byepi kimye kitanshi kyo mwayile mu mwingilo?
1 Nanchi mukivuluka kimye kitanshi kyo mwayile mu mwingilo wa ku nzubo ku nzubo nyi? Mwafwainwa mwaumvwine bingi moyo. Inge mwaingijilenga pamo na bemufunjishenga Baibolo nangwa basapwishi bakwabotu, kwa kubula nangwa kuzhinaukatu ne mwasangalele bingi pa kwimukwasha. Byo kiji kuba’mba pano mwi ba mwingilo baibijila, nenuwa muji na mutembo wa kufunjisha bakatataka bya kusapwila.
2. Ñanyi bintu byafwainwa kufunda basapwishi bakatataka?
2 Basapwishi bakatataka bafwainwa kufunda bya kutendeka kwamba na mwina nzubo, kwingijisha Baibolo, kubwelako ne bya kutendeka mafunjisho a Baibolo. Bafwainwa ne kufunda bya kwingila mu mbaji yapusana pusana ya mwingilo, nabiji busapwishi bwa mu mukwakwa ne mu mapunzha a busulu. Mwakonsha kwibakwasha kuyilako palutwe mu ino mbaji kupichila mu byo muba ne mu kwibabula bya kuba.
3. Twakonsha kwikala byepi bakumwenako bawama mu mwingilo?
3 Ikalai Bakumwenako pa Kufunjisha: Yesu wamwesheshe baana banji ba bwanga bya kusapwila. (Luka 8:1; 1 Pe. 2:21) Umvwe mwanengezha kwingila na musapwishi wakatataka, nengezhai jishinda japela ja kwingijisha pa kusapwila jakonsha kulondela musapwishi wakatataka, kampe jiji mu mabuku etu amo. Mwafwainwa kutendekelapo kusapwila pa nzubo imo nangwa abiji pa kuba’mba musapwishi omvwe byo musa kwambanga. Pa kuya ku nzubo ikwabo, mwipuzhai ambe jishinda jo amona’mba mwaji kuba bulongo. Kuba bino kukamulengela kumona buneme bwa kwingila na bakwabo mu mwingilo kabiji kikamupelela kuswa jishinda jo mwakonsha kufuukula panyuma ya kuba aye wasapwila.
4. Twakonsha kukwasha byepi musapwishi wakatataka panyuma ya kumvwa byo a kwamba?
4 Tongolaipo Mashinda Amo: Yesu wafunjishanga baana banji ba bwanga bya kusapwila. (Mat. 10:5-14) Nenuwa mwakonsha kwibafunjisha basapwishi bakatataka byonka byo a ubanga. Umvwe ye ubena kwamba, mutelekeshai. Inge wapwisha, mutakaikai pa kuya ku nzubo ikwabo nangwa kya kuba mwakumona mo abena kukebwa kuwamishako. Saka mukyangye kumubula bya kuba, mwakonsha kupembelela mwamona inge usa kuba bulongo pa nzubo ikwabo. Kampepo waji kumvwatu moyo. Vulukainga kuba’mba basapwishi baji na bya bupe byapusana pusana kabiji mwakubila bintu mwavula.—1 Ko. 12:4-7.
5. Twakonsha kutendeka byepi pa kubulañana bya kuba?
5 Kimye kimo musapwishi wakatataka wakonsha kwimwambila’mba mumubuleko bya kuba. Bino inge wabula kwamba, anweba yenka mukwashai. Mwakonsha kumukwasha byepi bulongo? Basapwishi bamo baibijila bepuzha’mba: “Nkubulepo jishinda jimo nyi?” nangwa’mba: “Twa kwingila byepi lelo?” Jishinda jikwabo mwakonsha kwamba’mba: “Byo najinga musapwishi wakatataka kyankatazhanga bingi pa ... , bino kino kinkwasha bingi... .” Kimye kimo kyanema kupesapesa nanji mu mabuku. Pa kuba’mba mubule kumubula byavujisha pa kimye kimo, kyawama kumubulapotu jishinda jimo.
6. Mu mwingilo, ‘kyela kya kapotwe kitwisha byepi kyela kikwabo’?
6 Kyela kya Kapotwe Kitwisha Kyela Kikwabo: Timoti wajinga musapwishi waibijila, bamutundaikile kwi Paulo kutesha muchima pa kufunjisha ne kuyilako palutwe. (1 Timo. 4:13, 15) Nangwa kya kuba papita myaka yavula po mwatendekejile kuya mu mwingilo, kechi mwafwainwa kuleka kuwamisha busendwe bwenu ne. Funjilainga ku basapwishi bo mwingila nabo, nangwatu boba babula kwibijila mu mwingilo, kabiji inengezhai kukwasha bakwenu bulongo kikatakata bakatataka, pa kuba’mba nabo bekale basendwe mu mwingilo wa kusapwila mambo awama.—Mana. 27:17.