Lubaji 10—Kufunjishanga Mafunjisho a Baibolo Anunguluka
Kufunjisha bo Tufunjisha Baibolo mu Mwingilo wa ku Nzubo ne Nzubo
1 Umvwe bakulumpe mu kipwilo bamona’mba ufunda Baibolo wafikapo kwikala musapwishi wabula kubatizwa, wafwainwa kutatula kwingijila pamo na kipwilo mu mwingilo wa kusapwila. (Monai buku wa Bakwatankana Kuba Kyaswa Muchima wa Yehoba, mape. 79-81.) Twakonsha kukwasha byepi ye tufunjisha kutendeka kwingila mwingilo wa kusapwila ku nzubo ne nzubo?
2 Kunengezhezha pamo: Kunengezha bulongo kwanema bingi. Mubulai ye mufunjisha po akonsha kutana mashinda a kwambilamo aji mu Mwingilo Wetu wa Bufumu ne mu kabuku ka Amalyashi ya mu Baibolo Aya Kulanshanyapo, kabiji mukwashai kusalapo jishinda japela kwamba jakonsha kwingila bulongo mu nyaunda yenu. Kyonka kimye kitanshi, mutundaikai kwingijishanga Baibolo mu mwingilo.—2 Timo. 4:2.
3 Kyawama musapwishi wakatataka kupitulukilamo jimo nanji mu mashinda a kwingijisha. Kimye ye mufunjisha kyo abena kupituluka mu byo asa kwamba, mubulai ayukile jimo byo akonsha kukumbula mepuzho epuzhiwa javula mu nyaunda yenu. (Kolo. 4:6) Mubulai kuba’mba mwina Kilishitu wa mwingilo kechi uyukatu mikumbu yonse ya mepuzho akonsha kwipuzha mwina nzubo ne. Javula kyawama kukumbula’mba patanshi nkiye na kupesapesa pa ano mepuzho apa bino nkabwele tukesambepo.—Mana. 15:28.
4 Kusapwila Pamo: Kimye kitanshi ye mufunjisha kyo aya mu mwingilo wa ku nzubo ne nzubo, mulekai amone byo musakwingijisha jojo jishinda jo mwakupitulukamo nanji. Mubulai naye asunsepo. Kimye kimo kyakonsha kuwama kubula yewo musapwishi wakatataka kusunsapotu pacheche pa jojo jishinda jo mwaji kunengezhela nanji pamo nabiji kutangako kinembelo ne kwambapo. Muyukai yewo muntu byo aji ne papelela bulume bwanji. (Fili. 4:5) Mutakaikainga pa byo abena kuba mu mbaji yapusana pusana ya mwingilo wa kusapwila yo mubena kumufunjisha pachepache.
5 Kyawama kukwasha musapwishi wakatataka kwikala na mutanchi wa kuyanga kimye kyonse mu mwingilo, inge kyakonsheka wafwainwa kuyanga mulungu ne mulungu. (Fili. 3:16) Umvwañanai bimye byo mwafwainwa kwingijilanga pamo mu mwingilo, kabiji ne kumutundaika kwingijila pamo na basapwishi bakwabo babambakana. Ñiñijilo yabo ne kupwanañena pamo kukamukwasha kwikala na busendwe ne kutana lusekelo mu mwingilo wa kusapwila ku nzubo ne nzubo.