Lubaji 12—Kufunjishanga Mafunjisho a Baibolo Anunguluka
Kukwasha Botufunjisha Kutendeka ne Kufunjisha Mafunjisho a Baibolo
1 Inge botufunjisha Baibolo batendeka kuya mu mwingilo wa mu bujimi, bakonsha kwikala na moyo wa kutendeka ne kufunjisha mafunjisho a Baibolo abo bene. Twakonsha kwibakwasha byepi kwikala na luketekelo mu luno lubaji lwanema lwa mwingilo wetu?—Mat. 24:14; 28:19, 20.
2 Umvwe ufunda Baibolo waikala musapwishi wabula kubatizwa, ko kuba’mba kampe wanembesha ne kala mu Sukulu ya Mwingilo wa Teokalasi. Lufunjisho lo abena kufunda pa kunengezha ne kwamba majashi o apewa lukamukwasha kwikala na busendwe bwa kufunjisha bukebewa ku ‘muntu wa mwingilo wabula ne kya kubilako bumvu, kasa atwalatu bulongo mambo a bukine.’—2 Timo. 2:15.
3 Ikalai ba Kumwenako: Yesu wafunjishe baana banji ba bwanga kupichila mu kwibapa mikambizho ne kwibamwesha kya kumwenako kyawama. Waambile’mba: “Bonse pa kulumbuluka bekala byonka biji shabo ja bwanga.” (Luka 6:40) Kyanema bingi kwi anweba kulondela Yesu kupichila mu kwikala ba kumwenako bawama mu mwingilo wenu. Ye mufunjisha umvwe ke emumone monka mwayila mu mwingilo, ukayuka kuba’mba nkebelo ine ya kubwelako ke ya kutendeka mafunjisho a Baibolo.
4 Mulumbulwilai amba inge twaambila mwina nzubo kufunda nanji, kechi jonse jo kikebewa kulumbululatu ponkapo lufunjisho lonse byo lwikala ne. Javula kiwamatu kumumwesha lufunjisho byo lwikala kupichila mu kwingijisha palagalafu imo nangwa abiji mu buku wa kufundamo. Mashinda a kwi mukwasha kuba kino aji pa peja 8 ya uno Mwingilo Wetu Wa Bufumu ne wa January 2002 pa peja 6.
5 Umvwe kibena kukebewa, bulai yewo ye mufunjisha kuya nenu nangwa kuya na musapwishi wayuka bulongo ku mafunjisho a Baibolo akwabo. Wakonsha kwambapo pa palagalafu nangwa pa kinembelo paji bishinka. Pa kumona byo mubena kwisamba, awa ye mufunjisha ukayuka byavula bya mwa kufunjishila mafunjisho a Baibolo anunguluka. (Mana. 27:17 2; Timo. 2:2) Mu takaikai, kabiji isambai nanji pamo pamo po afwainwa kwingijila.
6 Kufunjisha basapwishi bakatataka kwikala bafunjishi ba Mambo a Lesa kukebalengela kwingila ‘mingilo yawama’ ya kutendeka ne kufunjisha mafunjisho abo bene. (2 Timo. 3:17) Byo kyawamapo kwingijila nabo pamo kusampanya lwito lwa butemwe lwa kuba’mba: “Aye wasaka naye atambule mema a bumi a bupetu”!—Lum. 22:17.