Kufunjishanga Mafunjisho a Baibolo Anunguluka
Lubaji 1: Lufunjisho lwa Baibolo Loluka?
1 Kuzhokoloka ntanda yonse, pepi nobe 6 milyonyi mafunjisho a Baibolo abena kufunjishiwa na bantu ba Lesa pa ñondo pa ñondo. Umvwe ke twingijishe mashinda awama kufunjishishamo, twakonsha kukwasha ano mafunjisho a Baibolo kununguluka kufika ku kwipana ne kubatizwa kuba’mba nabo ‘bakonshe kufunjisha ne bakwabo.’ (2 Timo. 2:2) Nanchi mwakonsha kutemwa kukwasha bo mufunjisha kuba’mba banunguluke nyi? Kutatula na uno Mwingilo Wetu wa Bufumu, munembwanga mitwe yapusana pusana yaamba pa bya kufunjishanga Mafunjisho a Baibolo anunguluka.
2 Kimye kya Kunemba Sawakya wa Lufunjisho lwa Baibolo: Umvwe kimye kyonse saka mwisamba bulongo misambo ya mu Baibolo nangwatu ipi, kwingijisha Baibolo ne buku uji yense waitabizhiwa kufunjishamo, ko kuba’mba mubena kufunjisha lufunjisho lwa Baibolo. Kino kyaikala kya kine nangwatu kya kuba lufunjisho lubiwa pa kibelo kya nzubo ya yewo muntu nangwa pa lamya. Mwakonsha kunemba sawakya wenu wa lufunjisho panyuma ya kufunjisha bimye bibiji kufuma po mwatanchikile bya kufunda kabiji inge mwamona’mba lufunjisho lukatwajijila.
3 Buloshuwa wa Nanchi Lesa Ukebaka ne buku wa Kuyuka byo bingijishiwa kufunjishamo mafunjisho a Baibolo avula. Umvwe mwapwisha ano mabuku kabiji kyamwesha’mba awo muntu ubena kununguluka nangwa kya kuba ubena kununguluka pachepache, kabiji ubena kusanchila ne bintu byo abena kufunda, kyawama kutwajijila na kufunda mu buku wa Popwelai Lesa. Mwakonsha kwingijisha buloshuwa waamba’mba Mwakonsha Kwikala Balunda na Lesa! kufunjishamo bantu babula kufunda sukulu kufika palepa nangwa bakabakana pa kutanga.
4 Mwingilo wa kufunjisha lufunjisho lwa Baibolo waingila bingi bulongo mu kukwasha bantu bavula kwikala baana ba bwanga bakine ba kwa Yesu Kilishitu. (Mat. 28:19, 20) Umvwe saka mwingijisha mashinda ekalanga mu mitwe ikalondelangapo, kikemukwasha kufunjishanga lufunjisho lwa Baibolo lununguluka.