Kuwamishako Busendwe Bwetu bwa Kusapwila—Kufunjisha Bakatataka

Ene Mambo o Kwanemena: Baana ba bwanga ba kwa Yesu bakatataka bafwainwa kufunda kulama “bintu byonse” byo akambizhe, kuvwangako ne kufunjisha bakwabo bukine. (Mat. 28:19, 20) Bakatataka bavula banembesha kala mu Sukulu wa Mwingilo wa Lesa kabiji basapwila balongo babo nangwa balunda nabo. Nangwa byonkabyo, inge bayuka buneme bwa bintu byo bafunda ne kuyuka kuba’mba Yehoba ukeba’mba bantu bonse bomvwe mambo awama, bafuukulapo kutendeka kuya mu mwingilo wa kusapwila. (Loma 10:13, 14) Inge bakatataka bafikilamo kwikala basapwishi babula kubatizhiwa, bakebewa kwibafunjisha kusapwila kwa kubula moyo pa kuba’mba batwajijile kukosesha bulunda bwabo na Lesa.—Luka 6:40.

Byo Mwafwainwa Kuba:

Kwashainga bakatataka kutambula mabuku a kwingijisha mu mwingilo wa kusapwila ne kufunjisha. Babuulai mabuku o mubika mu kyola kya mu mwingilo ne kwibalumbulwila mwingilo wa buku yense ye musenda mu mwingilo.
Salaipo jishinda ja kwisambilamo jiji mu Mwingilo Wetu wa Bufumu ne kupitulukamo. Tundaikai wa katataka kwingijisha jo jo jishinda mu byambo byanji. Pitulukai mu mashinda mwakwambila engila bulongo mu nyaunda yenu aji mu buku wa Sukulu wa Mwingilo, pa jipa 82. Ambai ne pa buneme bwa mvwajilo ne mwekelo yawama.—2 Ko. 6:3, 4.
Bafunjishainga pachepache. Mweshai musapwishi wa katataka kakikachi ka nyaunda, ne kumufunjisha bya kwingijisha kapepala ka ku nzubo ku nzubo. Mumweshai bya kunemba bikebewa pa muntu ukeba kufunda Baibolo. Mufunjishai bya kwingijisha jw.org mu mwingilo ne kabuku ka Good News for People of All Nations (Mambo Awama a ku Bantu ba Mikoka Yonse). Mukwashai kubwela ku bantu bakeba kufunda.—1 Ko. 3:6.
Mwafwainwa kumutekenya ne kumutakaika. (Maana 25:11) Wafwainwa kulondela byo muba. Inge mwaikala na mukoyo wa kusapwila ne kuta bantu muchima ne aye byo byo akobanga.

Esekai Kuba Bino uno Ñondo:

Ingilai busapwishi bwa ku nzubo ku nzubo na ye mufunjisha Baibolo, kabiji mwafwainwa kumusendako pa kubwela ku bantu bakeba kufunda Baibolo nangwa bo mufunjisha Baibolo. Inge kechi mujipo na musapwishi ye mufunjisha Baibolo ne, ingilai na musapwishi wabula kupijilwa.