Lubaji 11—Kufunjishanga Mafunjisho a Baibolo Anunguluka
Kukwasha Basapwishi Bakatataka Kubwelako
1 Umvwe ufunda Baibolo watatula kuya mu mwingilo wa kusapwila, ukatananga bantu bakeba mambo awama. Twakonsha kukwasha byepi musapwishi wakatataka kubwelako kabiji ne kubayisha lusekelo lwa bantu bo atana?
2 Kubwelako kutatula na lwendo lutanshi. Kwashai yewo musapwishi wakatataka kumwesha lusekelo lwa kine mu bantu bo ambañana nabo. (Fili. 2:4) Mufunjishainga pachepache bya kulengela mwina nzubo kwamba biji ku muchima wanji, kuteleka ku byo babena kwamba, kabiji ne kuyuka bintu byo balangulukapo kimye kyonse. Umvwe muntu wamwesha lusekelo, mwambilai yewo musapwishi wakatataka kunemba bintu bibena kukebewa. Ingijishai byobyo bintu byo mwanemba kumukwasha kunengezhelamo misambo ikalondelapo.
3 Kunengezha Kubwelako: Pitulukaimo mu mwisambo ye mwajinga nanji pa lwendo lutanshi, kabiji ne kubula musapwishi wakatataka bya kusala mambo a Bufumu akonsha kuzakula muchima wa mwina nzubo. (1 Ko. 9:19-23) Nengezhelai pamo ñambilo ya kwamba pa kinembelo kimo kya mu Baibolo pamo na palagalafu imo iji mu buku wakufundamo. Kununga pa kino, nengezhai ne bwipuzho bwa kwipuzha ku mpelo ya mwisambo bwa kukatatwilamo mwisambo ukalondelapo. Mfunjishai musapwishi wakatataka bya kukwasha muntu kuyukilako byavula mu Mambo a Lesa pa kimye kyonse kyo abwelako.
4 Kabiji kyanema bingi kufunjisha musapwishi wakatataka byambo byapela bya kutendekelamo mwisambo kimye kyo mwabwelako. Panyuma ya kwimuna mwina nzubo, wakonsha kwamba’mba: “Nasangalele bingi na mwisambo ye twajinga nanji, kabiji nabwela jikwabo namba twisambilepo byambo bikwabo bya mu Baibolo [tongolai mutwe].” Kabiji mwakonsha ne kufunjisha musapwishi wakatataka bya kuba umvwe pa nzubo mwatanapo muntu ungi.
5 Kosaiko na Kubwelako: Kwashai musapwishi wakatataka kwikala wa kumwenako wawama wa kubwelako bukiji bukiji ku bantu bamwesheshe lusekelo. Kikebewa kubwelako bwelako javula pa kuba’mba mutane bantu pa mazubo abo. Mufunjishai musapwishi wakatataka bya kulayañana na bantu amba ukeya na kwibamona jikwabo, kabiji mukwashai kuyuka buneme bwa kubwelelako ku bo alaya. (Mat. 5:37) Mufunjishai musapwishi wakatataka kwikala na lusa, kulangulukilako bantu ne kwikala na mushingi kimye kyo abena kukeba bantu baji nobe mikooko kabiji ne kubayisha lusekelo lwabo.—Titu. 3:2.