Kuwamishako Busendwe Bwetu bwa Kusapwila—Kwikala Nkwasho Wawama mu Mwingilo

Mambo ka o Kyanemena: Yesu wamwene kuba’mba kyanema bantu kwikwasha mu mwingilo wa kusapwila. Onkao mambo, kimye kyo atumine baana ba bwanga 70 kuya na kusapwila, wibatumine babiji babiji. (Luka 10:1) Musapwishi umo wakonsha kukwasha musapwishi mukwabo ye abena kwingila nanji inge watalañana na lukatazho nangwa inge wakankalwa kukumbula bwipuzho mu mwingilo. (Sapwi. 4:9, 10) Wakonsha kushimikizhapo byamumwekejile kabiji ne kumona mashinda amo o akonsha kukwashishamo ye abena kwingila nanji pa kuba’mba ekale musapwishi wafikapo. (Mana. 27:17) Kimye kyo babena kufuma kunzubo imo kuya ku ikwabo, wakonsha kutundaika ye abena kwingila nanji kupichila mu misambo ya lutundaiko. —Fili. 4:8.