Ikalai Bakukwashañana Bawama mu Mwingilo
1. Ñanyi mfweto ifuma mu kwingila babiji mu mwingilo?
1 Kimye kimo Yesu watumine baana banji ba bwanga 70 na kusapwila. ‘Wibatumine babiji babiji.’ (Luka 10:1) Kwakubula nangwa kuzhinaukatu ne, luno lunengezho lwalengejile baana banji ba bwanga kwikwasha ne kwitundaika bene na bene mu busapwishi. Inge twaingila na mukwetu musapwishi mu mwingilo, twafwainwa kumukwasha byepi?
2. Mambo ka o twafwainwa kutelekelanga inge mukwetu ubena kwamba, kabiji twafwainwa kutelekanga byepi?
2 Kuteleka: Mwafwainwa kutelekesha inge mukwenu ubena kwamba. (Yako. 1:19) Inge ke atange kinembelo, londelaingamo mu Baibolo wenu. Tajishainga ubena kwamba, kikale mukwenu nangwa mwina nzubo. Umvwe mwata muchima ku misambo, mwina nzubo naye ukatako muchima.
3. Inge mukwetu ubena kwamba kimye ka kyo twafwainwa kwambapo?
3 Kuyuka Kimye kya Kwambapo: Umvwe ye tuji nanji ubena kwamba, tumunemeka kupichila mu kuleka wapwisha kwamba. (Loma 12:10) Kechi tumuchibikizha ne. Umvwe walubamo byo abakebenga kwamba nangwa mwina nzubo waipuzha bwipuzho, nangwa inge mukwetu walomba bukwasho, twafwainwa kukumbwila monka mwafwainwa, kechi kwamba pa bintu bikwabo ne. (Mana 16:23; Sapwi. 3:1, 7) Byo tubena kwamba byafwainwa kulamata kyo tubena kwisambapo.—1 Ko. 14:8.
4. Ki ka kiketulengela kwikala na lusekelo ne kwingila bulongo mu mwingilo?
4 Baana banji ba bwanga 70 byo babwelele kufuma mu busapwishi, ‘babwelele na lusekelo.’ (Luka 10:17) Netuwa tukekala na lusekelo ne kwingila bulongo mu mwingilo inge saka tuteleka ne kuyuka kimye kya kwambapo, kimye kyo tubena kukwasha bo tuji nabo mu mwingilo.