Ikomeshainga Anwe Bene na Bene Kimye kyo Muji mu Mwingilo
1 Atweba bonse tumvwa bingi bulongo kutambwila ‘byambo byafwainwa’ bya lutundaiko. (Mana. 25:11) Umvwe tubena kwingila na bakwetu mu mwingilo, twakonsha kumona byepi’mba misambo yetu ibena kwibatundaika?
2 Misambo Ikomeshañana: Kimye kyo tuji mu mwingilo wa busapwishi, kyawama bingi kwisambanga pa bintu bya ku mupashi bikomeshañana! (Sala. 37:30) Twakonsha kwisamba pa mashinda a kusolomokelamo bantu nangwa kwishimikizha ne bintu bimo bikoseshañana byamwekele mu mwingilo wa mu bujimi. (Byubilo 15:3) Nanchi pajipo kishinka kituzakwile muchima pa kutanga Baibolo pa bunke bwetu, mu magazini a bukumo nangwa pa kupwila kwa kipwilo nyi? Twakonsha kwisamba pa bishinka byaambiwe mu jashi ja mvula bantu jajingako katataka mu Nzubo ya Bufumu.
3 Twakonsha kufichishiwa ku muchima umvwe mwina nzubo washikisha bwipuzho bo twakonsha kukankalwa kukumbula. Kikwasha bingi umvwe pa kufuma pa nzubo ya yewo muntu twaikalako na maminiti acheche a kwisamba na mukwetu mo tubena kwingijila pa bya kukakumbula bwipuzho bwa yewo mutundu mu kimye kya kulutwe, kampe kupichila mu kwingijisha buku wa Ukupelulula. Kabiji umvwe mukwetu wauba bulongo pa kwisamba na mwina nzubo, twafwainwa kumusanchila ne kumutundaika.
4 Tendekelaipo Yenka Anweba: Nanchi mujipo bamo mu jibumba jetu ja lufunjisho lwa buku bo tukyangye kwingilapo nabo nyi? Kwibambila’mba tukengila nabo mu mwingilo wa mu bujimi kwakonsha kwitulengela ‘kwikwasha atwe bene na bene.’ (Loma 1:12) Bapainiya ba kimye kyonse ne bakukwasha basanta bingi kwikalapo na bakwingila nabo, kikatakata lukelo nangwa mabanga, mambo pa bibye bimye kechi kwikala basapwishi bavula baya mu mwingilo ne. Twakonsha kutundaika bapainiya kupichila mu kwingila nabo. Abya kujipo musapwishi ubelabela ubula kwingilako pakatampe mu mwingilo nyi? Kwingila na musapwishi wa uno mutundu, nabiji kuya nanji ku lufunjisho lwetu lwa Baibolo kwakonsha kumukosesha bingi.—Mana. 27:17.
5 Lutakaiko ne byambo bya lusanchilo bikosesha bingi bakwetu nangwatu mu bintu bicheche. Twafwainwa kuvulukanga kino kimye kyonse kyo tubena kwingila na bakwetu mu mwingilo, mambo tukeba ‘kwikomesha atwe bene na bene.’—1 Tesa. 5:11.