Ikwashainga mu Mwingilo
1. Twakonsha kulondela byepi byaubile mutumwa Paulo kimye kyo tubena kwingila na bakwetu mu mwingilo?
1 Mutumwa Paulo wamonanga kwikala na bakwabo ba mu lwitabilo kuba’mba kyajinga kimye kya ‘kwikosesha atwe bene na bene mu lwitabilo lwetu.’ (Loma 1:12) Umvwe mubena kwingila na musapwishi mu mwingilo, nanchi mu mutundaika ne kumukwasha nyi? Mu kifulo kya kuzhindamatu, mubulaiko bintu bimukwashishe kwikala musapwishi wabambakana.
2. Twakonsha kuba byepi pa kuba’mba tukwashe musapwishi ye tubena kwingila nanji mu mwingilo kwiketekela, kabiji kino kyanemena ka?
2 Ikwashainga Kwiketekela: Basapwishi bavula kechi beketekela ne, kabiji kino kyakonsha kumwekela ku kilungi ne mu ñambilo. Twakonsha kwibakwasha kwiketekela kupichila mu kwibasanchila. Ñanyi mashinda akwabo o twakonsha kwingijisha pa kwibakwasha kwiketekela? Kalama wa mwanzo umo ubula musapwishi ye abena kwingila nanji pa moyo ye aji nanji ne byo alomba javula pa kushinda uno moyo. Mulongo umo waambile pa kimukwasha kwiketekela amba: “Mwafwainwa kumwemwesela. Kimo kimye ndomba pa kuba’mba ngube bino.” Nanchi kujipo bintu bimukwasha kwiketekela mu mwingilo nyi? Bulaiko musapwishi mukwenu ye mubena kwingila nanji.
3. Ñanyi bintu byo twakonsha kubulako muntu ye tubena kwingila nanji mu mwingilo pa kuba’mba tumukwashe kwingila bulongo mu mwingilo?
3 Ibulaingako Mashinda Mwakwambila: Nanchi mwayukapo jishinda japela ja kutendekelamo mwisambo, kampe pa kintu kimo kyamweka ku mpunzha yenu nyi? Nanchi kujipo jishinda jo mwingijisha mwafuma byawama kununga pa mashinda a kwisambilamo nyi? Bulaiko musapwishi mukwenu. (Mana 27:17) Byo mubena kubwela ku bo mwisambile nabo, mwakonsha kwisamba pa byo mubena kukeba kuba ne byo mwakonsha kuba bino. Panyuma ya kupwisha kufunjisha lufunjisho lwa Baibolo, kampe mwakonsha kulumbulula kyo mwa kwingijishisha kishinka kimo, kinembelo, nangwa jishinda jimo pa kuba’mba mufike ye mufunjisha pa muchima.
4. Mambo ka o twafwainwa kukwashishanga basapwishi bakwetu?
4 Basapwishi ba mu kitota kya myaka kitanshi, kechi bakebangatu kukwasha bantu babula kwitabila ne. Betundaikanga ne kwikosesha bene na bene. (Byu. 11:23; 15:32) Mutumwa Paulo wafunjishe mwanyike Timoti ne kumutundaika kubulako bakwabo bintu byo afunjile. (2 Timo. 2:2) Umvwe twatwajijila na kutundaika ne kukosesha bena Kilishitu bakwetu mu mwingilo, kechi twibalengelatu kwikala na lusekelo ne kuyuka bya kwingila mu mwingilo ne, bino tutokesha ne Shetu wa mwiulu.—Hebe. 13:15, 16.