Nanchi Mumwesha Bantu byo Tufunjisha Baibolo pa Kimye Kitanshi Nyi?

Umvwe mwaambila bena nzubo amba mufundenga nabo Baibolo, bamo bakana nangwa kwamba’mba bafunda Baibolo ku chechi kwabo. Mambo kechi bayuka’mba tufunjisha Baibolo mu jishinda japusanako na bifunjisha bupopweshi bukwabo ne, kabiji kechi bayuka buwame bujimo ne. Onkao mambo mu kifulo kya kwibambilatu’mba tufundenga nabo Baibolo, nga mambo ka a kubujila kwibamwesha mu kimye kichechetu byo tufunjisha Baibolo pa kimye kitanshi? Kyakumwenako: Kechi mwakonsha kwambilatu bantu amba mwayuka kuteka ne kwibabula’mba mukeya na kwibapa kajo kimye kikwabo ne, mwafwainwa kwibapa’mba batompepo! Mwakonsha kuba bino mu ka kimye kacheche kwingijisha mashinda aji pa jipa 6 mu Mwingilo Wetu wa Bufumu wa January 2006:

“Nanchi mulanguluka’mba juba jikafika bino byambo po bikafikizhiwa nyi? [Tangai Isaya 33:24, lekai akumbule.] Lekai ne mumweshepo byaamba uno mutwe.” Pai mwina nzubo buku wa Baibolo Ufunjisha ne kumumwesha jifuka 22 pa jipa 36. Tangai bwipuzho buji panshi ya jipa, ne kumubula mwina nzubo amba byo musakutanganga jifuka atane mukumbu. Apa bino mwipuzhe bwipuzho jikwabo ne kumuteleka mwina nzubo byo asakukumbula. Tangaipo ne binembelo bikwabo. Mwipuzhai bwipuzho bwa kukakumbula pa kubwelako ne kumulaya juba jo mukabwelako. Umvwe mwauba bino ko kuba’mba mwatendeka lufunjisho lwa Baibolo.