Mwakonsha Kwikala Mufunjishi!
1. Jishuko ka jiikajila jiji na musapwishi yense wa Bufumu?
1 Kufunjisha muntu bukine ke lubaji lumo lwa mwingilo luleta bingi lusekelo. Kumona muntu byo abena kutambwila mambo a Bufumu ne kumukwasha kufwenya kwipi ne Nkambo mwina bintu byonse ke kintu kimo kyo twafwainwa kunemeka bingi. (Yako. 4:8) Kufunjisha muntu uji na nzala ya kukeba kuyuka bukine kabiji ne kumona byo abena kupimpulu bumuntu bwanji, bwikalo ne byubilo byanji ke kikonkwanyi musapwishi yense wa Bufumu kyo afwainwa kwibikila.—Mat. 28:19, 20.
2. Mambo ka bamo o bakonsha kukankazhamina kufunjisha lufunjisho lwa Baibolo, kabiji ki ka kyakonsha kwibakwasha kupwisha luno lukatazho?
2 Ketekelai mwi Yehoba: Mu kimye kya kukala, bakalume bakishinka balangulukilenga amba kechi bakonsheshe kwingila mwingilo Yehoba ye ebapele kwingila ne. Kuketekela mwi Yehoba Lesa kwalengejile Mosesa, Yelemiya, Amosi ne bantutu bakwabo kuleka kwizhinauka ne kutwajijila kwingila uno mwingilo wanema. (Lupu. 4:10-12; Yele. 1:6, 7; Amo. 7:14, 15) Mutumwa Paulo naye ‘wachinchikile.’ Waubile byepi bino? Waambile’mba wachinchikile “mwi Lesa wetu.” (1 Tesa. 2:2) Ee kine, atweba bonse twakonsha kuketekela mwi Yehoba kwitupa bukwasho, maana ne bulume bukebewa pa kufunjisha mafunjisho a Baibolo abena kuba bulongo.—Isa. 41:10; 1 Ko. 1:26, 27; 1 Pe. 4:11.
3, 4. Lufunjisho ka lujiko lwitukwasha kuyuka bya kufunjisha Mambo a Lesa?
3 Funjishiwainga: Mufunjishi wetu Mukatampe, aye Yehoba Lesa witufunjisha kupichila mu mutanchi wa kimye kyonse wa lufunjisho lwa bintu bya ku mupashi kuba’mba twikale bafunjishi bayuka kufunjisha bulongo. (Isa. 54:13; 2 Timo. 3:16, 17) Funjishiwainga kupichila mu kwibikishako kumvwisha binembelo kabiji ne kuwamishako busendwe bwenu bwa kufunjisha bukine bwa mu Baibolo. Byo kiji kuba’mba ino yo nkebelo ine ya kupwila kwa Sukulu wa Mwingilo wa Lesa ne Kupwila kwa Mwingilo, kupwila kwa kipwilo konse kwitufunjisha kuyuka bya kufunjisha kwingijisha Mambo a Lesa.
4 Ibikishaingako kufunda mashinda apela kwingijisha kufunjishishamo bukine bwa ku mupashi bwazhika. Buku wa Nonkelenimo, pa peja 227, walumbulula’mba: “Mwafwainwa patanshi anwe bene kumvwisha yewo mutwe wenu bulongo umvwe mukeba’mba bantu nabo bakamumvwishe bulongo.” Kukumbulapo pa kupwila kwitukwasha kulabijila bishinka bikatampe bya kwingijisha mu bwikalo bwetu kulutwe. Onkao mambo, nengezhainga bulongo kupwila, kabiji mukamona’mba mubena kukomesha busendwe bwenu bwa kufunjisha.
5. Ñanyi lufunjisho lukwabo lubiwa monka mu kipwilo lwa kwitukwasha kuyuka bya kufunjisha bulongo?
5 Kufumatu ne kukala, bamwingilo bena Kilishitu bafunjilanga ku bakwabo mo baingijilanga pamo pa kwingila mwingilo wa kulenga baana ba bwanga. (Luka 10:1) Umvwe kyakonsheka, ne anweba ingijilainga pamo na basapwishi bayuka bulongo kufunjisha kuvwangako bapainiya, bakulumpe mu kipwilo ne bakulumpe benda mu mwingilo wa kufunjisha bantu Baibolo. Monai byo bengijisha bya kumwenako byapela kumvwa ne bintutu bikwabo bya kufunjishishako biji mu mabuku etu akufundamo kulumbulwilamo bukine bwa mu Binembelo. Bepuzhai kwimubulako mashinda o mwakonsha kwingijisha pa kuba’mba ne anweba muyuke bya kufunjisha bulongo. (Mana. 1:5; 27:17) Basanchilai pa byo babena kwimufunjisha, mambo luno lo lufunjisho lufuma kwi Lesa.—2 Ko. 3:5.
6. Ki ka kikebewa pa kuba’mba muntu ekale mufunjishi wa Mambo a Lesa?
6 Ketekelai mwi Yehoba ne kumwenamo mu lufunjisho lo etufunjisha. Kibikainga mu milombelo kuba’mba muyilengako palutwe mu kuyuka bya kufunjisha bulongo. (Sala. 25:4, 5) Ne anweba mwakonsha kumona lusekelo lufuma mu kukwasha muntu kuba’mba ekale mufunjishi wa Mambo a Lesa byonka byo muji!