Yehoba Ubena Kwitufunjisha bya Kwingila uno Mwingilo

1. Inge Yehoba wapa bantu mwingilo, ñanyi kintu kikwabo kyo oba?

¹ Yehoba inge wapa bantu mwingilo, wibapa ne bukwasho bwa kwibakwasha kwingila yewo mwingilo. Kyakumwenako, kimye Yehoba kyo aambijile Nowa kufiika bwato bo abujile kufikapo kala, wamubujile ne byo afwainwe kwibufiika. (Nte. 6:14-16) Kimye aye Mosesa wajinga kimote kabiji kafunga byo bamupele mwingilo wa kuya na kusolomoka bakulumpe ba bena Isalela ne Felo, Yehoba wamulayile’mba: “Amiwa nkekala na kanwa kobe ne kukufunjisha byo ukamba.” (Lupu. 4:12) Ne atweba, Yehoba witupa mwingilo wa kusapwila mambo awama, kabiji kechi witushatu bunke bwetu ne. Ubena kwitufunjisha bya kwingila uno mwingilo kupichila mu Sukulu wa Mwingilo wa Lesa ne Kupwila kwa Mwingilo. Twakonsha kumwenamo byepi mu luno lufunjisho?

2. Twakonsha kumwenamo byepi mu Sukulu wa Mwingilo wa Lesa?

² Sukulu wa Mwingilo wa Lesa: Pitulukilaimo jimo mu majashi aji pa mutanchi saka mukyangye kuya na kupwila. Kimye kyo mukatelekanga baana ba sukulu na kwamba majashi, mukomvwisha ne kuyuka byo mwakonsha kufunjisha bulongo. (Mana 27:17) Sendainga buku wenu wa Sukulu wa Mwingilo ku kupwila ne kumwingijisha. Kimye kalama wa sukulu kyo akambangapo bishinka mu uno buku panyuma ya mwana wa sukulu kwamba jashi, shabulai pa bishinka bikatampe byo mwakonsha kukeba kwingijisha kabiji ne kunemba bishinka bikwabo kwashala mpunzha pa jojo jipa. Nangwa byonkabyo, pa kuba’mba mumwenengamo mu uno sukulu, mwafwainwa kwambangako majashi. Nanchi mwanembesha mu uno sukulu nyi? Inge bemupa jashi mu sukulu, nengezhai bulongo ne kwingijisha jifunde jo bemupa kulondela mu buku. Kimye kyo muji mu mwingilo, ingijishainga byo mufunda mu sukulu.

3. Ki ka kyakonsha kwitukwasha kumwenamo mu Kupwila kwa Mwingilo?

³ Kupwila kwa Mwingilo: Tukavulukanga bulongo bishinka byambiwa mu kuno kupwila kupichila mu kutangilamo jimo ne kwinengezha kukumbulapo. Inge mikumbu yetu yaikala ipi, tukalengela bavula kukumbulapo. Taingako muchima ku bimwesho bikalako pa kupwila ne kwingijisha mashinda amo o mwamona’mba akonsha kwimulengela kwingila bulongo mu mwingilo. Inge mu Mwingilo Wetu wa Bufumu muji bibaba byakonsha kwimukwasha mu mwingilo, bilamai bulongo.

4. Mambo ka o twafwainwa kwingijishanga bintu bitufunjisha Lesa?

⁴ Byonka byakatezhe mwingilo ye bapele Nowa ne Mosesa, ne mwingilo wetu wa kusapwila mambo awama pano pa ntanda ponse byo byo aji. (Mat. 24:14) Twakonsha kwingila bulongo umvwe twaketekela mwi Yehoba, aye Mufunjishi wetu Mukatampe kabiji ne kulondela bintu byo etufunjisha.—Isa. 30:20.