Kusapwila Kwitukosesha ku Mupashi

1. Tumwenamo ka mu mwingilo wa busapwishi?

¹ Kubambakana mu mwingilo wa busapwishi kulengela bulunda bwetu ne Yehoba kukosa kabiji kwituletela bingi lusekelo. Kine kintu kyo tuyila mu mwingilo, ke kukeba kutokesha Yehoba pa muchima. Nangwa byonkabyo, kukokela mukambizho wa ‘kusapwila mambo’ kwituletela mapesho a Yehoba kabiji tumona byawama mu mashinda avula. (2 Timo. 4:2; Isa. 48:17, 18) Nga kusapwila kwituletela byepi lusekelo ne kwitukosesha?

2. Kusapwila kwitukosesha mu ñanyi jishinda?

² Kwitukosesha Kabiji ne Kwitulengela Kwikala Batokwa: Kusapwila kwitulengela kutesha muchima pa bintu byawama Bufumu byo bukaleta mu kifulo kya kuta muchima ku makatazho o tupitamo. (2 Ko. 4:18) Kulumbulwila bakwetu mafunjisho a mu Baibolo kukosesha lwitabilo lwetu mu milaye ya Yehoba kabiji ne kwitulengela kumusanchila pa bukine bo etufunjisha. (Isa. 65:13, 14) Byo tukwasha bakwetu kukosesha bulunda bwabo ne Yehoba kuba’mba babule kwikala “ba panopantanda,” kitukosesha netuwa kutwajijila na kwifumyako ku bya ino ntanda.—Yoa. 17:14, 16; Loma 12:2.

3. Kusapwila kwitukwasha byepi kwikala na byubilo bya bwina Kilishitu?

³ Kusapwila kwitulengela kwikala na byubilo bya bwina Kilishitu. Kya kumwenako, kwibikako kuba’mba ‘twaluke ke bintu byonse ku bantu bonse’ kwitulengela kwikala bekepesha. (1 Ko. 9:19-23) Byo twisamba na bantu ‘basubakana ne kupelelwa pamo no mikooko yabula kafunga,’ kitulengela kwikala ba lusa kabiji bomvwa bulanda. (Mat. 9:36) Tufunda kuchinchika byo tutwajijila na kusapwila ku bantu bamilengulwila. Kabiji lusekelo lwetu lubailako byo twipana kukwasha bakwetu.—Byu. 20:35.

4. Mumvwa byepi pa mwingilo wenu wa busapwishi?

⁴ Twatokwa bingi pa kwikala na mwingilo utota Aye yenka ye twafwainwa kupopwela! Mwingilo wa busapwishi witukosesha. Tutokwa bingi umvwe saka tubambakana “kusapwila mambo awama.”—Byu. 20:24.