‘Panai Myeo Yenu’ ku Bomufunjisha Baibolo
1. Ki ka kikebwa pa kukwasha botufunjisha Baibolo?
1 Pa kukwasha ye tufunjisha Baibolo kwipana mwavwangwa byavula kechi kumufunjishatu Baibolo konka ne. Mutumwa Paulo waesakenye bulunda bwanji na boafunjishanga ku nsemi wa kifyele na baana banji. Netuwa tupana “myeo yetu” pa kukwasha botufunjisha kukoma ku mupashi.—1 Tesa. 2:7-9.
2. Mambo ka o twafwainwa kutela muchima botufunjisha Baibolo kabiji twakonsha kuba byepi bino?
2 Batai Muchima: Umvwe ye tufunjisha Baibolo ke engijishe byo abena kufunda, jiwi janji ja mu muchima jikamulengela kuleka kwichapankanya na bantu babula kulondela mafunde a mu Baibolo. (1 Pe. 4:4) Balongo banji bakonsha kumushikwa. (Mat. 10:34-36) Kumuta muchima kwakonsha kumukwasha kubula kwikala na binyenge. Mishonale umo waingila myaka yavula waambile’mba: “Kechi mwafwainwa kuya aku mupwishatu kufunda ne. Umvwe kyakonsheka mwafwainwa kukikala mwisambako pacheche.” Monaipo mashinda amo a kumukwashishamo. Kyakumwenako, abya mwakonsha kumutumina lamya nangwa kumufwakesha umvwe wakolwa nyi? Nanchi mwakonsha kwikala pamo na ye mufunjisha Baibolo pa kupwila pa kuba’mba mu mukwashengako na baana nyi?
3. Twakonsha kukwasha byepi botufunjisha Baibolo kutambwila lutundaiko ku kipwilo?
3 Kipwilo byo Kyakonsha Kukwasha: Umvwe mubena kwingijila kwipi na kwikela ye mufunjisha Baibolo, mambo ka akubujila kumufwakesha pa ka kimye kacheche pa kuba’mba mukwenu ye mubena kwingila nanji a muyuke? Pa kimye pa kimye saka muya na basapwishi bapusana pusana ne na bakulumpe mu kipwilo ku bomufunjisha Baibolo. Aku mutendekatu kufunjisha muntu Baibolo mutundaikainga kuya na kupwila ku Nzubo ya Bufumu. Kuba bino kukamulengela kupwanañana bulongo na ba mu kipwilo abo bakonsha kwikala balongo banji ba ku mupashi.—Mako 10:29, 30; Hebe. 10:24, 25.
4. Ki ka kyo tukamwenamo umvwe twata muchima botufunjisha Baibolo?
4 Bansemi batapo muchima kukwasha baana babo ku mupashi bekala na lusekelo umvwe baana babo batendeka kwingijila Yehoba ne kwenda mu bukine. (3 Yoa. 4) Netuwa twakonsha kwikala na lusekelo umvwe twapana myeo yetu amba tukwashe botufunjisha Baibolo.