Kakitenguluzha Ka Mepuzho

◼ Nanchi Bakamonyi ba kwa Yehoba bafwainwa kusampanya byambo byo bakopa nangwa majashi nyi?

Majashi a Baibolo etukosesha ne kwitutundaika bingi. (Byu. 15:32) Onkao mambo, kechi kyatama kubulako boba babujile kutanwako bino byambo bya lutundaiko ne. Kwingijisha biñambañamba byapusana pusana bya kukopelako, bakonsha kukopa jashi ne kwijisampanya ku bakwabo inge bebabula kuba byo byo. Bamo balama majashi a pusana pusana kubikako ne majashi aambiwe kala, bashimisha nangwa kwiakopa jikwabo ne kupa bakwabo. Bakwabo balenga makeyala pa Intaneti ne kubikapo majashi kuba’mba aba bakeba bakopololenga.

Kechi kyatama kukopa majashi a kwingijisha atweba bene nangwa ba mu kisemi kyetu ne. Kabiji bakulumpe mu kipwilo bakonsha kunengezha kukopelako majashi boba bakankalwa kutanwa ku kupwila na mambo a kukolwa. Nangwa byonkabyo, kuji bishinka byawama byakonsha kwitulengela kubula kusampanya byambo byo twakopa nangwa majashi.

Na mambo a kuba’mba majashi ambiwa kwesakana na byo kiji ku yo yo mpuzha, twakonsha kumvwina mungi bishinka bimo, mambo kechi twayuka kyalengejile jashi kwambiwa mu jo jo jishinda ne. Kunungapo, kyakonsha kukatazha kuyuka waambile jashi ne kimye kyo jaambiwe pa kuba’mba tuketekele’mba abyo byambo bikingila ne ano moba kabiji bya kine. (Luka 1:1-4) Kusampanya majashi nangwa byambo byakopelwe kwakonsha kulengela bamo kutambula nangwa kupana mushingi wabula kufwainwa.—1 Ko. 3:5-7.

Kalume wakishinka kabiji wa maana wingila na ngovu kunengezha kajo ka ku mupashi “kawaina” kabiji “pa kimye kyafwainwa.” (Luka 12:42) Kino kyavwangamo kunengezha majashi ambiwa mu bipwilo bya Bakamonyi ba kwa Yehoba, maselechi ne matepu aji pa Intaneti pa keyala wa jw.org. Twafwainwa kuketekela’mba kalume wakishinka kabiji wa maana ne Jibumba Jitangijila jimwimenako jiketupa bintu byo tukeba pa kuba’mba tukose mu lwitabilo.—Byu. 16:4, 5.