Byo Twafwainwa Kwingijisha byo Bakopela pa Maselechi

1. Kununga pa mabuku, ñanyi bintu bikwabo byo tuji nabyo byo twakonsha kumwenamo?

¹ Bantu bavula bamwenamo bingi kutanga byambo bya bukine pa jw.org. (Sapwi. 12:10) Nanchi muteleka ku byo bakopela pa maselechi nyi? Mwakonsha kuteleka ku maselechi aji pa Keyala wetu. Twakonsha kumwenamo byepi mu byo bakopela pa maselechi?

2. Twakonsha kwingijisha byepi byo bakopela pa maselechi pa bunke bwetu nangwa pa lufunjisho lwa kisemi?

² Bya Kwingijisha Bunke Bwetu Nangwa pa Lufunjisho lwa Kisemi: Kuteleka ku mashimikila a mu Baibolo, magazini ne mabuku o bakopela pa maselechi inge tuji pa lwendo nangwa tubena kwingila mingilo ikwabo kwakonsha kwitukwasha kwingijisha bulongo kimye kyetu. (Efi. 5:15, 16) Pa kupopwela kwetu kwa kisemi twakonsha ne kuteleka ku byo batangila jimo nabiji buku saka tulondelamo. Kuteleka ku byo batangila jimo kwakonsha kwitukwasha kutanga bulongo nangwa inge tubena kufunda mulaka.

3. Bañanyi mu nyaunda yetu bakonsha kumwenamo mu byo bakopela pa maselechi?

³ Mu Mwingilo: Bantu baji mu nyaunda yetu bamba’mba bafwakyo kimye kya kutanga mabuku bakonsha kutemwa kuteleka ku byo bakopela pa maselechi. Nangwa twakonsha kutana bantu bamba mulaka ungi bakonsha kutemwa kumvwa mambo awama ‘mu mulaka wabo.’ (Byu. 2:6-8) Mu mapunzha amo, kuteleka ku bintu ke kisho. Kyakumwenako, bantu bamba mulaka wa Hmong ku China baji na kisho kya kushimikizha mashimikila baana babo kabiji balabijila bintu byo bateleka. Mu bisho byavula bya mu Africa, bantu bafunda bintu kupichila mu kushimikizha mashimikila.

4. Ñanyi mepuzho o twakonsha kwishikisha pa kukwasha bantu baji mu nyaunda yetu?

⁴ Nanchi mwakonsha kujizha byo bakopela pa maselechi mu mulaka wa mwina nzubo mu nyaunda yenu nyi? Nanchi muntu wakonsha kumwenamo mu buku ye batangila jimo inge mwamutumina kwingijisha intaneti nyi? Nanchi twakonsha kukopolwela pa selechi buku ye batangila jimo ne kupa mwina nzubo wamwesha lusekelo pamo na buku ye bapulinta nyi? Inge twaingijisha intaneti kupa muntu buku, buloshuwa, magazini nangwa talakiti mu mwingilo, twafwainwa kunemba kyo twasha. Bintu byo bakopela pa maselechi bebinengezha kwibingijisha pa bunke bwetu ne kubyala nkunwa ya Bufumu ya bukine.—1 Ko. 3:6.