Nanchi Muteleka ku Baibolo ye Batangila Jimo Nyi?

Ñanyi Baibolo ye batangila jimo? Baibolo wa Binembelo bya Ntanda Ipya yeye batangila jimo. Babena kumulupula pachepache mu milaka yapusana pusana. Uno Baibolo wawama bingi kutelekako mambo baingijisha mawi apusana pusana kwesakana na waambile byobyo byambo wanembwa mu Baibolo. Bataanga kwesakana na byamwekelenga ne byaumvwinenga bobo bantu pa kuba’mba balumbulule bukine bwa mu Baibolo byonka byakebelenga mwine Lesa patanshi.

Bamo babena kumwenamo byepi mu kuteleka ku Baibolo ye batangila jimo? Bavula bateleka ku uno Baibolo ye batangila jimo bomvwa bingi bulongo mambo jishinda jo bamutangilamo jibafika bingi pa muchima. Bamba’mba kumvwa mawi apusana pusana abatanga babena kusombolola batongolwa mu Baibolo kwibalengela kufwanyikizha byamwekelenga ne kumvwisha mwatala mashimikila a mu Baibolo. (Man 4:5) Kabiji bavula bamba’mba kuteleka ku Baibolo ye batangila jimo kwibatekenesha bingi inge baji na bijikila.—Sl 94:19.

Kuteleka ku Mambo a Lesa o batangila jimo kwitukwasha bingi mu bwikalo bwetu. (2Mo 34:19-21) Inge Baibolo ye batangila jimo uji mu mulaka ye mumvwa, lubaji lumo nangwa yense, nanchi mwakonsha kutendeka kutelekako jonse nyi?

TAMBAI LUBAJI LWAFUMA MU VIDYO WA KUBA’MBA BYO BAFYATULA BAIBOLO YE BATANGILA JIMO, APA BINO MUKUMBULE BUNO BWIPUZHO:

Ñanyi kintu kyo mwatemwa bingi pa byo bafyatula Baibolo ye batangila jimo?