‘Lekai Kyeya Kyenu Kimwekenga’
1. Kya bupe ka kyo tuji nakyo kyo twafwainwa kumwesha ku bantu?
1 Kyeya kyawama kikalako kutendeka ku manyanshi kufika ku kimye kya muntuwa muntuwa, kilengela bantu kutota Yehoba Lesa. Bino, Yesu waambilenga pa kyeya kikwabo baana banji ba bwanga kyo bafwainwe kumwesha, ko kuba’mba “kyeya kya bumi.” (Yoa. 8:12) Kumwesha kino kyeya kya ku mupashi ke kya bupe kyanema kyavwangamo kwingila mingilo ikatampe. Yesu wakambizhe’mba: ‘Lekai kyeya kyenu kimweke ku bantu bonse,’ kuba’mba bamwenemo. (Mat. 5:16) Mu kino kimye bantu kyo baji mu mfishi ikatampe ya ku mupashi, kino kyeya kyafwainwa kusama kabiji kibena kukebewa bingi! Byonka byaubile Kilishitu, twakonsha kusamisha byepi kyeya kyetu?
2. Yesu wamwesheshe byepi buneme bwa kusamisha kyeya kya ku mupashi?
2 Kupichila mu Kusapwila: Yesu waingijishe kimye, bulume ne bintu byanji bya ku mubiji kuyukanyikishishamo kyeya kya bukine ku bantu, bo atananga ku mazubo, mu mikwakwa, ku mitumba, ko kuba’mba konse konse kwatanwanga bantu. Wayukile buneme bwa kusamisha kyeya kya ku mupashi. (Yoa. 12:46) Pa kuba’mba kyeya kisame ku bantu bavula, Yesu wafunjishe baana banji ba bwanga kwikala “kyeya kya panopantanda.” (Mat. 5:14) Basamishanga kyeya kyabo kupichila mu kuba bintu byawama ku bakinkalankulo ne kwibafunjisha bukine bwa ku mupashi.
3. Twakonsha kumwesha byepi lusanchilo pa mambo a kyeya kya bukine kyo tuji nakyo?
3 Bantu ba Lesa batako bingi muchima ku ‘kwenda byafwainwa baana ba kyeya’ kabiji basapwila konse konse kutanwa bantu. (Efi. 5:8) Kutanga Baibolo nangwa mabuku akwabo a bena Kilishitu pa mvula bantu kimye kyo mubena kukokolokako pacheche ku nkito nangwa ku sukulu kwakonsha kwimulengela kutendeka mwisambo wa mu Baibolo. Na mambo a kulondela kino, nyenga wakyanyike watendekele lufunjisho lwa Baibolo ne kusha mabuku 12 ku bakwabo baana ba sukulu!
4. Mambo ka ‘kusamisha kyeya kyetu’ o kukebewa kwikala na byubilo byawama?
4 Kupichila mu Kuba Mingilo Yawama: Kusamisha kyeya kyetu kwavwangamo kuba mingilo yawama kimye kyonse. (Efi. 5:9) Kumwesha byubilo byawama pa nkito, pa sukulu ne ku mapunzhatu akwabo kutanwa bantu, javula kuzakula michima ya bantu ne kwibalengela kukeba kufunda bukine bwa mu Baibolo. (1 Pe. 2:12) Kyakumwenako, byubilo byawama byajinga na kalombwana wa myaka itanu byalengejile mufunjishi wanji kwita bansemi banji. Uno mufunjishi wamukazhi waambile’mba, “Nkyangye kumonapo mwana uji na maana a kuyuka kyawama ne kyatama.” Kine, mwingilo wetu ne byubilo byetu byawama bilengela bantu kumona “kyeya kya bumi” ne kutota Lesa wetu.