“Kyeya Kyenu Kimweke”
1 Byubilo ne mingilo ya ku mupashi kuzhokoloka ntanda yonse biji mu mfishi. Kyeya kya bukine kyo kisolola ino “mingilo yatu” ya mfishi pa kuba’mba tuchiine bya kwituntulako. Mutumwa Paulo kyo kyo akambizhizhe bena Kilishitu’mba: “Endainga mwafwainwa bana ba kyeya.”—Efi. 5:8, 11.
2 “Bipangwa bya kyeya” byapusenshatu na bya mfishi ya ino ntanda. (Efi. 5:9) Pa kuba’mba bino bipangwa bimweke twafwainwa kwikala na byubilo byawama mu bwikalo bwa bwina Kilishitu, bantu baitabizhiwa na Yesu. Kabiji twafwainwa kwikala bantu bepana na muchima yense, bakishinka kabiji babambakana mu bukine. Bino bipangwa byafwainwa saka bimweka pa juba pa juba mu bwikalo bwetu ne mu mwingilo wetu.
3 Mweshai Kyeya Paji Ponse: Yesu wabujile baana banji ba bwanga’mba: “Kyeya kyenu kimweke ku meso a bantu.” (Mat. 5:16) Umvwe ke tusapwile mambo a Bufumu bwa Lesa ne nkebelo yanji, abya tubena kusamisha kyeya kya Yehoba ne kulonda Yesu. Tusama pamo nobe byeya kimye kyo tufwakashisha bantu pa mazubo abo ne byo tusampanya bukine ku nkito, pa sukulu ne kubakwetu botwikala nabo kipi-kipi, nangwatu paji ponse potutana bantu.—Fili. 2:15.
4 Yesu waambile’mba bamo bakashikwa kyeya. (Yoa. 3:20) Onkao mambo, kechi tubwela pa nyuma umvwe bavula bakana “kyeya kya mambo awama a lukumo lwa Kilishitu” kusamina mwi abo. (2 Ko. 4:4) Yehoba umona mu michima ya bantu kabiji kechi usaka bantu boba byubilo byatama mu bantu banji ne.
5 Umvwe ke tulondele mashinda a Yehoba ne kwiyowa kyeya kya ku mupashi, twakonsha kwikimwesha ne ku bakwetu. Byubilo byetu umvwe bibalengela kuyuka’mba tuji na “kyeya kya bumi,” nabo bakonsha kutundaikwa kupimpula byubilo byabo kuba’mba bekale na kyeya.—Yoa. 8:12.
6 Kupichila mu kumwesha kyeya kyetu, tutakaika Mulenga wetu ne kukwasha bantu bakishinka kumuyuka ne kwikala na luketekelo lwa bumi bwa myaka ne myaka. (1 Pe. 2:12) Byo tuji na kyeya, twayai twikingijishe mu kukwasha bakwetu kufuma mu mfishi ya ku mupashi ne kwingila mingilo ya kyeya.