‘Ikalai na Michima ya Kifyele’
1. Bantu lelo jino babena kukeba ka?
1 Kukila kala, bantu bavula lelo jino bakebewa bingi kwibobila kifyele. Bintu byatama bibena kubiwa mu ntanda bibena kulengela bantu bavula kwikala na binyenge, kubula kwikala na lusekelo ne luketekelo. Bavula bekeba kwibakwasha kabiji atweba bena Kilishitu yetu twafwainwa kumwesha kifyele ku bantu. (Mat. 22:39; Nga. 6:10) Twakonsha kumwesha byepi kino kifyele?
2. Ñanyi jishinda jawama jo twafwainwa kumwesheshamo bantu kifyele?
2 Mwingilo Umwesha Kifyele: Kafwako lutekenesho lwa kine kabiji lwa myaka lwakila lolwa lufuma kwi Lesa ne. (2 Ko. 1:3, 4) Yehoba witukambizha kumulondela kupichila mu “kwikala na michima ya kifyele” kabiji witupa mwingilo wa kufwakesha bantu ne kwibasapwila mambo awama a Bufumu. (1 Pe. 3:8) Kwibikishako kwingila uno mwingilo ke jishinda jawama ja kutekenesheshamo “bantu balajika muchima” mambo Bufumu bwa Lesa bo bonkatu bukapwisha makatazho a bantu. (Isa. 61:1) Na mambo a lusa lo amwesha ku bantu banji, Yehoba katatakatu akafumyepo bubi kabiji ne kuleta ntanda ya katataka ya bololoke.—2 Pe. 3:13.
3. Twakonsha kumona byepi bantu byonka Yesu byo ebamonanga?
3 Monainga Bantu Byonka Yesu byo Ebamonanga: Nangwatu kimye kyo asapwilanga ku mabumba akatampe, Yesu watanga muchima bantu pa muntu pa muntu. Wayukanga bintu muntu yense byo akebanga ku mupashi. Bajinga nobe mikooko yabula kafunga wa kwibatangijila. Yesu waumvwine bingi lusa pa byo amwene kabiji kino kyamulengejile kwibafunjisha. (Mako 6:34) Kumona bantu byonka Yesu byo ebamonanga kuketulengela ne atweba kumwesha bantu lusa pa muntu pa muntu. Kino kikamwekela mu byo tumweka pa kwamba ne jishinda jo twambilamo. Tukatangizhako mwingilo wa kusapwila kabiji tukambanga bintu kwesakana na bikeba bantu pa muntu pa muntu.—1 Ko. 9:19-23.
4. Mambo ka o twafwainwa kutwajijila kwikala na michima ya kifyele?
4 Jibumba ja bantu mwaya ntanda baji bingi na lusekelo na mambo a kumvwa mambo a Bufumu ne kwibata muchima. Inge twatwajijila kwikala na michima ya kifyele, tukanemeka ne kutokesha ku muchima Lesa wetu wa kifyele, aye Yehoba.—Kolo. 3:12.