Nanchi Baana Benu Benengezha Nyi?
1. Mambo ka baana basukulu o bafwainwa kwinengezhezha jimo?
1 Baana ba Bakamonyi ba kwa Yehoba bapita mu makatazho avula bingi ku sukulu. Kabiji kimye kyonse kyo bashinkula masukulu, bapita mu makatazho apusana pusana. Nangwa byonkabyo, ano makatazho o bapitamo ebalengela kwikala na jishuko ja ‘kushimuna bukine.’ (Yoa. 18:37) Nanchi benengezha kimye kyonse bya kuba na ano makatazho nyi?
2. Baana benu bafwainwa kuyuka ka pa kuba’mba benengezhe?
2 Nanchi baana benu bayukisha bulongo byo kilumbulula kwivwanga mu bisela bya ntanda ne moba a kukokoloka a bantu babula kupopwela Lesa ne ene mambo a kubila bino bintu o kwatamina nyi? Nanchi benengezha kumona mwa kubila na makatazho a bya kukeba kufunda kufika palepa, busambe, kutoma malwa nangwa kwingijisha bizhima nyi? Abya bakambangatu’mba bupopweshi bwabo bwakanya bino byubilo nyi, inyi bayuka bya kulumbulula mwatala bintu byo baitabilamo?—1 Pe. 3:15.
3. Bansemi bakonsha kwingijisha byepi Kupopwela kwabo kwa Kisemi kunengezhezhamo baana babo?
3 Bakwashainga pa Kimye kya Kupopwela kwa Kisemi: Pa kuno kupopwela kwa kisemi kyawama kwisamba na baana pa makatazho o bapitamo ku sukulu nangwatu akwabo o bakonsha kupitamo kulutwe. Kwisamba na baana benu pa makatazho o bapitamo ku sukulu saka bakyangye kushikula masukulu abo ne, kukebakwasha kuyuka mwa kubila na oo makatazho. Pa Kupopwela kwa Kisemi kumo, mwakonsha kwisamba na baana benu pa bino bintu. Mwakonsha kwipuzha baana benu bintu bibalengela kwikala na bijikila pa kuya ku sukulu. Kabiji mwakonsha kupitulukamo jikwabo mu bintu byo mwisambilepo pa myaka ya kunyuma, byo kiji kuba’mba baana benu bakomenako ne kuyukilapo byavula. (Sala. 119:95) Mwakonsha ne kubapo bimwesho bimo, anweba mo mwakonsha kwikala nobe mufunjishi, muntu ufundañanako pa sukulu nangwa kwikala mwana wa sukulu mukwabo. Funjishainga baana benu kuyuka bya kukumbula mepuzho kwingijisha Baibolo ne mabuku akwabo nabiji buku wa Ukupelulula ne wa Ifipusho Abacaice Bepusha. Nsemi umo waubangapo bimwesho kunengezhezhamo baana banji bya kusolomoka bafunjishi babo ba katataka pa sukulu ne kwibabula’mba twi Bakamonyi ba kwa Yehoba.—Monai Kyamba kya Usopa, December 15, 2010, mapa 3-5.
4. Bansemi ba maana bafwainwa kuba ka?
4 Makatazho abena kupitamo bena Kilishitu bakyanyike mu ano moba a kupelako abena kuya na kuvujilako ne ‘kukatazha.’ (2 Timo. 3:1) Bansemi ba maana balangulukila jimo pa makatazho akonsha kupitamo baana babo kabiji ne kwibanengezhezha jimo bya kwiapwisha. (Mana. 22:3) Baana saka bakyangye kushinkula masukulu, esekai na ngovu kwibanengezhezha jimo bya kuba na makatazho.