Kange Mukankazhamenga Kusapwila Ne
1. Ki ka kyakonsha kwimulengela kwibikako, kabiji mambo ka?
1 Nanchi mwakikankazhamapo kala kusapwila pa sukulu na mambo a kuba mwachiine kwimwendeleka nyi? Kikebewa bingi kwibikako pa kubatu’mba musapwile, kikatakata inge muji na bumvu. Ki ka kyakonsha kwimukwasha?
2. Umvwe kemukebe kusapwila bakwenu pa sukulu, mambo ka o kikebewa kuyuka mwakubila bintu?
2 Yukai bya Kuba: Nangwa kya kuba mwakonsha kumona pa sukulu kwikala nyaunda yenu ya kusapwilamo, vulukai’mba kechi mwakonsha kuketekela kutendeka kwisamba bintu bya ku mupashi na muntu yense pa sukulu byonka byo mwakonsha kuba inge muji mu mwingilo wa ku nzubo ku nzubo ne. Yukai bulongo kimye kyo mwafwainwa kwamba. (Sapwi. 3:1, 7) Mutwe ye mubena kufundapo nangwa mwingilo ye mubena kuba mu kalashi wakonsha kwimulengela kubula bakwenu bintu byo mwaitabilamo. Nangwa mwana wa sukulu mukwenu wakonsha kwimwipuzha ene mambo o mubujila kubako bintu bimo. Bena Kilishitu bamo babujila jimo bafunjishi babo aku bayatu pa sukulu kuba’mba Bakamonyi ba kwa Yehoba kabiji bapa bafunjishi babo mabuku aamba pa byo baitabilamo. Bakwabo basha mabuku pa bipona byabo kuba’mba balengele bakwabo baana ba sukulu kwibepuzha pa oo mabuku.
3. Mwakonsha kwinengezha byepi kusapwila pa sukulu?
3 Inengezhai: Umvwe mwinengezha, mukakasuluka kusapwila. (1 Pe. 3:15) Onkao mambo, esekai kulanguluka pa mepuzho akonsha kwipuzha bantu kabiji ne byo mwakonsha kwiakumbula. (Mana 15:28) Umvwe kyakonsheka, bikainga mu kyola kyenu kya ku sukulu Baibolo ne mabuku amo nabiji buku wa Ukupelulula, Ifipusho Abacaice Bepusha ne mabuku akwabo aamba pa bilengwa kuba’mba mwiengijishenga inge kekikebewe. Ambilai bansemi benu kuba’mba pa kimye kya kupopwela kwenu kwa kisemi, mubengapo bimwesho bimo byakonsha kwimukwasha pa sukulu.
4. Mambo ka o mwafwainwa kutwajijila kusapwila pa sukulu?
4 Ikalai na Mweno Yawama: Kange mulangulukenga amba kimye kyonse kyo mukambanga bukine, bakwenu bo mufunda nabo bakemwendelekanga ne. Bamo bakonsha kukumbwa byo mwibikako kabiji bakonsha kuteleka ku byo mubena kwamba. Pano bino, kechi mwafwainwa kulefulwa inge bakana ne. Yehoba ukomvwa bingi bulongo pa kwibikako kwenu. (Hebe. 13:15, 16) Twajijilai kulomba kwi aye kuba’mba emukwashe ‘kwambanga mambo anji na kuchinchika.’ (Byu. 4:29; 2 Timo. 1:7, 8) Akilangulukai byo kyakonsha kuwama inge muntu wateleka byo mubena kwamba. Awo muntu wakonsha ne kwikala kalume wa Yehoba!