Lamawizhanga Jiwi Jobe ja mu Muchima

1. Ñanyi kishina kya Kubuñana kwa Juba Jimo kwa mwaka wa mwingilo wa 2013, kabiji mambo ka o banengezhezha uno mutanchi?

¹ Kila juba tupita mu bintu byakonsha konauna milanguluko yetu. Oene mambo kubuñana kwa juba jimo kwa mu mwaka wa mwingilo wa 2013, kuka tendeka pa September 1, 2012, kyo kwaikela na mutwe wa kuba’mba “Lamawizhanga Jiwi Jobe ja mu Muchima.” (1 Timo. 1:19) Kuno kubuñana bekunengezha kwitukwasha kuyuka byo twakonsha kwingijisha kino kya bupe kitupa Mulenga wetu.

2. Mepuzho ka anema aka kumbulwa pa kubuñana?

² Teshaiko Muchima ku Bino Bishinka: Kuno kubuñana kukakumbula mepuzho atanu na abiji aamba pa jiwi jetu ja mu muchima:

• Ñanyi bintu byakonsha konauna jiwi ja mu muchima?

• Twakonsha kufunjisha byepi jiwi jetu ja mu muchima?

• Twakonsha kubinga byepi ku mashi a bantu bonse?

• Kulanguluka ne kuba bintu mwayila mafunde a mu Baibolo kusololapo ka pe atweba?

• Twakonsha kuchinuzhuka byepi konauna jiwi ja mu muchima ja bakwetu?

• Anweba bakyanyike, mwakonsha byepi kuchinchika umvwe ke bemukanjikizhe kuba byatama?

• Ñanyi byawama bifuma mu kulondela jiwi ja muchima jitangijilwa na mupashi?

3. Twakonsha kumwenamo byepi mu kubuñana?

³ Na bukwasho bwa Yehoba twakonsha kushinda Satana ukeba konauna jiwi jetu ja mu muchima. Kupichila mu Mambo anji ne Jibumba janji, Shetu wa mwiulu wa butemwe ubena kwitubula kuba’mba: “Jishinda jino jo mwafwainwa kuyamo.” (Isa. 30:21) Kuno kubuñana jo jishinda jimo Yehoba jo abena kwitutangijilamo. Onkao mambo, inengezhai kuba’mba mukatanweko ku kuno kubuñana. Mukatesheko muchima ne kumona byo mwakonsha kwingijisha byambo byo mukafunda. Isambainga pa byambo byo mukafunda na kisemi kyenu. Kwingijisha byambo byo tukafunda kuketulengela kutwajijila ‘kwikala na jiwi ja mu muchima jawama’ ne kwitukwasha kuchinuzhuka bintu bya kwa Satana byakonsha konauna bulunda bwetu ne Yehoba—1 Pe. 3:16.