Funjilai ku Bangauzhi—Yona
1. Ñanyi byubilo byawama byamwesheshe Yona?
1 Mulangulukapo amba ka pe ngauzhi Yona? Bamo balanguluka amba wajinga na moyo kabiji kechi wajinga na lusa ne. Nangwa byonkabyo, wamwesheshe kwipelula, kuchinchika ne kwipana. Twakonsha kufunjilako ka ku byubilo byawama byamwesheshe Yona?—Yako. 5:10.
2. Twakonsha kulondela byepi kya kumwenako kya kwa Yona kya kwipelula?
2 Kwipelula: Kimye kitanshi kyo bamutumine kuya na kusapwila, Yona wanyemejile ku muzhi mukwabo. Kino kechi kya kuzhinauka ne, mambo bena Asilya bajinga bantu bakanama kabiji muzhi wa Ninevwa wajinga ‘muzhi mo baichilanga mashi.’ (Na. 3:1-3) Bino panyuma ya kumufunjisha kwi Yehoba, waswile kwingila mwingilo byo bamwambijile jikwabo. (Mana 24:32; Yona 3:1-3) Nangwa kya kuba kimye kitanshi wanyemene, bino waingijile mwingilo wamupele Lesa. (Mat. 21:28-31) Nanchi tutwajijila kusapwila mambo awama umvwe betufundako nangwa inge nyaunda yetu yakatazha kwingijilamo nyi?
3. Twakonsha kumwesha byepi kuchinchika ne kwipana mu mwingilo wetu?
3 Kuchinchika ne Kwipana: Yona byo ayukile’mba ye walengejile bantu bajinga mu bwato kukeba kufwa, wibambijile kumutaya pa meema. (Yona 1:3, 4, 12) Panyuma ya bino, Yona wayile mu muzhi wa Ninevwa na kwingila mwingilo ye bamupele wa kusapwila bunchibamambo bwa Yehoba. Kino kimwesha kuba’mba kechi wajinga na moyo ne, bino wajinga ngauzhi wa Lesa wachinchikile. (Yona 3:3, 4) Nga atweba twakonsha kuba byepi bino? Ne atweba lelo jino tukeba bulume bufuma kwi Lesa pa kuba’mba tusapwile mambo awama na kuchinchika mu bimye byakatazha. (Byu. 4:29, 31) Twafwainwa kwipana kwingijisha kimye ne bintu byetu bya ku mubiji mu mwingilo.—Byu. 20:24.
4. Mambo ka o twafwainwa kwikalangako na kimye kya kulanguluka pa byakumwenako byawama bya bangauzhi ba Yehoba?
4 Kimye kyo tubena kutanga mashimikila aamba pa bangauzhi ba Yehoba, tumwenamo umvwe ke tufwanyikizhe nobe twajingako. Mwakonsha kwiipuzha amba: ‘Umvwe kyamwekejile amiwa, inge naubile byepi? Nakonsha kulondela byepi byubilo byanji?’ (Hebe. 6:11, 12) Bibaaba bikwabo bya kulutwe mu Mwingilo Wetu wa Bufumu bikambanga pa byo twakonsha kufunjila ku bangauzhi ba Yehoba.