Funjilai ku Bangauzhi—Mika
1. Ñanyi bwipuzho Mika bo akonsheshe kwipuzha, kabiji mambo ka byambo byo asapwijilenga o byabujile kwikala byatutu?
1 ‘Ñanyi kimye mpelo ya buno bwikalo bwatama kyo ikafika?’ Ngauzhi Mika wafwainwa naye waipwizhe buno bwipuzho kimye kyo asapwijilenga bunchibamambo bwa Yehoba bukeya pa bufumu bwa bena Isalela ne Yuda. Byambo byasapwijilenga Mika kechi byajingatu byatutu ne. Mu mwaka wa 740 B.C.E.,Mika saka akyangye kufwa, byambo byaambile Yehoba ku bena Samaliya byafikile. (Mika 1:6, 7) Mu kuya kwa moba, Yelusalema waonawinwe mu mwaka wa 607 B.C.E. (Mika 3:12) Byo tubena kupembelela juba ja bunchibamambo bwa Yehoba mu ano moba, twafwainwa kulondela byepi byaubile Mika?
2. Tumwesha byepi kuba’mba twatekanya byo tubena kupembelela juba ja Yehoba, kabiji mambo ka?
2 Tekanyai: Mika wanembele’mba: “Pakuba amiwa nkatalanga kwi Yehoba, nkamupembelela Lesa yenkaye umpulusha; Lesa wami ukañumvwa.” (Mika 7:7) Mika kechi waikeletu na kupembela kuba’mba mpelo iye ne. Wapayankene mu mwingilo wa bungauzhi ye bamupeele kwi Yehoba. Byo tubena kupembelela juba ja Yehoba, twafwainwa “kwikala bantu baji na byubilo byazhila ne kwingila mingilo ya kunemeka Lesa.” (2 Pe. 3:11, 12) Kutekanya kwa Yehoba kwalengela bantu kwikala na kimye kya kulapila. (2 Pe. 3:9) Umvwe twatekanya, tukalondela lujimuno lwa mu Baibolo byonka byaubile ngauzhi Mika.—Yako. 5:10.
3. Mambo ka o twafwainwa kulombela kwi Yehoba mupashi wazhila?
3 Ketekelainga mu Bulume bwa Yehoba: Nangwa kya kuba mwingilo wa kwa Mika wakatezhe, waketekejile Yehoba kumupa bulume bwa kwingila. (Mika 3:8) Yehoba wayuka kuba’mba tukeba bukwasho kufuma kwi aye. O ene mambo Baibolo o itubujila kuba’mba twafwainwa kulombanga bulume kwi Yehoba. Upana bulume ku bakoka pa kuba’mba bengile mingilo ya Lesa. (Sala. 84:5, 7; Isa. 40:28-31) Nanchi bino bya kimumwekelapo kala byo mwingila mwingilo wazhila nyi? Nanchi mulomba Yehoba kwimupa mupashi wazhila kimye kyonse nyi?—Luka 11:13.
4. Tufunjilako ka ku bwikalo bwa kwa Mika lelo jino?
4 Mwingilo wanemene mu bwikalo bwa kwa Mika ke kuba kyaswa muchima wa Lesa. Nangwa waikalanga na bantu babi, watwajijile kwikala wakishinka. Kyo kimotu ne atweba, bukishinka bwetu bwesekwa kimye kyonse. Onkao mambo, twayai tutwajijile kwendanga mu “jizhina ja Yehoba Lesa wetu myaka yonsetu.”—Mika 4:5.