Myaka 100 ya Kutaya Mbila ya Bufumu
1. Myaka nobe 100 ya kunyuma, bantu ba Yehoba bebatundaikile kuba ka?
1 “Monai, Mfumu ubena kulama! Anweba yenu bantu bo engijisha. Onkao mambo, tayai mbila, tayai mbila, tayai mbila ya Mfumu ne bufumu bwanji.” Papita ne myaka nobe 100 kufuma kimye Mulongo Rutherford kyo aambile bino byambo. Bino byambo byatundaikile bingi bantu ba Yehoba kusampanya mambo a Bufumu mwaya ntanda. Kabiji kino kyo kyaubiwa. Byonka byaubile bena Kilishitu batanshi, twasapwila mambo awama “ku bilengwa byonse biji pano panshi.” (Kolo. 1:23) Inge twalanguluka pa myaka 100 yapitapo, ñanyi bintu byo twauba pa kuba’mba tutaye mbila ya Bufumu bwa Lesa? Twakonsha kutwajijila byepi kutaya mbila ya Bufumu byo tubena kufika mu mwaka wa bu 100 kufuma kimye Bufumu kyo bwatendekele kulama?
2. Mabuku etu atundaika byepi Bufumu bwa Lesa?
2 Kulanguluka pa byo Twaingila mu Myaka Yapitapo: Pa myaka yavula, mabuku etu atundaika bingi Bufumu bwa Lesa. Kutendekatu mu mwaka wa 1939, magazini ye twingijisha bingi uji na mutwe wa kuba’mba: Kyamba kya Usopa Kibena Kubijika Bufumu bwa Yehoba. Bimye byavula uno magazini wamba pa Bufumu ne byo bukoba. Kabiji Labainga! umwesha kuba’mba Bufumu bwa Lesa bo bonkatu bukapwisha makatazho abena kupitamo bantu. O ene mambo ano magazini abiji o atuntulwilwa ne kusampanyiwa kukila magazini akwabo onse pano pa ntanda.—Lum. 14:6.
3. Ñanyi mashinda amo o twaingijisha pa kutaya mbila ya Bufumu?
3 Bantu ba Yehoba baingijisha mashinda apusana pusana pa kutaya mbila ya Bufumu. Mu myaka ya kunyuma, twatayanga mbila kwingijisha myotoka yajinga na biñambañamba bya kwambilamo, kwamba majashi pa waileshi, ne kushimuna mambo awama kwingijisha bijimba bya maselechi byo basendanga mu byola. Ano mashinda etukwashishe kusampanya mambo awama ku bantu bavula bingi pa kimye kyo kwajingatu basapwishi ba Bufumu bacheche. (Sala. 19:4) Mu myaka ya kulutwe kuno, twanemba bintu byavula bingi biji pa keyala wa jw.org, mu jino jishinda, twasapwila mambo a Bufumu ku bantu bavula bingi, kubikapotu ne boba bekala mu byalo mo bakanya mwingilo wetu.
4. Ñanyi mashinda akatataka o tubena kwingijisha pa kusapwila?
4 Bantu ba Yehoba baingijishapo ne mashinda akatataka awama pa kusampanya mambo a Bufumu. Kutendeka mu ma 1990, kununga pa mwingilo wetu wa kusapwila ku nzubo ku nzubo, twatendekele kusapwila mu mapunzha mukokolokela bantu, mo bemikila myotoka ne mo bobila busulu. Katataka papo, twatendeka kwingijisha jishinda jawama ja kusapwilamo ku mvula bantu mu mizhi ikatampe monse mwaya ntanda. Kununga pa bino, basapwishi mu bipwilo byavula babena kusapwila ku mvula bantu mu nyaunda yabo kwingijisha matebulu ne twapasha ngolofwana po babika mabuku kikatakata mu mapunzha kupita bantu bavula. Nangwa byonkabyo, kusapwila ku nzubo ku nzubo kwatwajijila kwikala jishinda jikatampe jo tusapwilamo mambo a Bufumu.—Byu. 20:20.
5. Mwaka mupya wa mwingilo uketulengela atweba bavula kuba byepi?
5 Kulanguluka pa Mingilo Ibena Kwiya Kulutwe: Byo tubena kutendeka mwaka mupya wa mwingilo mu September, basapwishi bavula bakatendeka kwingila mwingilo wa bupainiya bwa kimye kyonse. Nanchi ne anweba mukatendeka bupainiya nyi? Inge kechi mwakonsha kwingila bupainiya bwa kimye kyonse ne, nanchi mwakonsha kwingilangako bupainiya bwa kukwasha nyi? Nangwa inge kechi mwakonsha kwingilako bupainiya ne, bino inge mwipana ne kwibikako kutaya mbila ya Bufumu na bulume bonse, Yehoba ukemupesha pa mingilo yenu.—Mala. 3:10.
6. Mambo ka ñondo wa October 2014 o akapusenako na bañondo bakwabo?
6 Mu ñondo wa October 2014, Bufumu bwa Lesa bukafikizha myaka 100 kufuma kimye kyo bwatendekele kulama. Onkao mambo, Kyamba kya Usopa kya bena kengi kya kusha mu uno ñondo wa October kikambanga pa Bufumu bwa Lesa. Nanchi kechi mwafwainwa kwibikako kushila bantu bavula kino Kyamba kya Usopa nenyi? Byo tubena kutengela bintu bya kulutwe, twayai atweba bonse pa muntu pa muntu tutwajijile ‘kusapwila mambo awama a Bufumu bwa Lesa’ ku bonse bakonsha kuteleka.—Byu. 8:12.