Mambo ka a Kukebela Kuyuka Biji Bufumu bwa Lesa?

Bantu bavula mwaya ntanda baketekela mu Bufumu bwa Lesa. Balondela byaubanga Yesu, wafunjishe baana banji ba bwanga kulomba’mba: “Bufumu bwenu bufike. Kyaswa muchima wenu kyubiwe pano pa ntanda.”—Mateo 6:10.

Nangwa kya kuba bantu bavula bakebesha bingi kuyuka biji Bufumu bwa Lesa, bupopweshi bwavula kechi bwatako muchima ne. Shayuka wa bya mpito aye H. G. Wells waambilepo pa kino amba Yesu “waambanga javula ne kufunjisha pa Bufumu bwa Mwiulu” kabiji “machechi avula a bwina Kilishitu kechi anemeka buno Bufumu ne.”

Bakamonyi ba kwa Yehoba bapusanako na ano machechi, mambo abo bamba bingi pa Bufumu bwa Lesa. Akilangulukai pa kino: Uno magazini ye mubena kutanga unembwa mu milaka 220. Uno magazini usampanyiwa mwaya ntanda yonse kabiji upulintwa makope pepi mamilyonyi 46. Ñanyi kintu kyambapo bingi uno magazini? Akimonai mutwe uji pa nkupiko wa kuba’mba: Kyamba kya Usopa Kibena Kubijika Bufumu bwa Yehoba.a

Pano mambo ka Bakamonyi bwa kwa Yehoba o batwajijila na kubijika pa Bufumu bwa Lesa? Kintu kimo kilengela ke kuketekela kuba’mba Bufumu bwa Lesa kyo kishina kya mu Baibolo. Kabiji twashiinwa kuba’mba Bufumu bwa Lesa bo bonkatu bukapwisha makatazho abena kupitamo bantu lelo jino.

Bakamonyi ba kwa Yehoba bamba bingi pa Bufumu bwa Lesa kabiji balondela byonka byaubanga Yesu. Byo ajinga pano pa ntanda, wanemekele bingi Bufumu bwa Lesa mu bwikalo bwanji ne mu mwingilo. (Luka 4:43) Mambo ka Bufumu o bwanemejile kwi Yesu? Kabiji ñanyi bintu byo mwafwainwa kumwenamo mu Bufumu? Twimutundaika kutana mikumbu ya mu Baibolo mu mitwe yalondelapo.